स्थानीय प्रशासनले तोकेको स्थानमा भन्दा बाहिर कार्यक्रम गरेपछि दुर्गा प्रसाईं र उनका समर्थकहरूले सोमबार भरतपुरमा आयोजना गरेको कार्यक्रममा प्रहरीले हस्तक्षेप गरेको छ ।

प्रसाईंले भरतपुरको चौबिसकोठी चोकमा कार्यक्रम गर्न थालेपछि प्रहरीले हटाउन हस्तक्षेप गरेको थियो । त्यसपछि प्रहरी र प्रसाईं पक्षबीच झडप र धकेलाधकेल भएको हो ।

झडपका क्रममा प्रहरीले प्रसाईंका तीनजना कार्यकर्तालाई पक्राउ गरेको जिल्ला प्रहरी कार्यालय चितवनका प्रवक्ता प्रहरी नायव उपरीक्ष रवीन्द्र खनालले बताए ।

‘प्रशासनले स्वीकृति दिएको ठाउँभन्दा बाहिर कार्यक्रम गरेपछि हटाउन खोजेका थियौँ, त्यसक्रममा ३ जनालाई नियन्त्रणमा लिएका छौं’, उनले भने ।

प्रशासनले प्रसाईंको समूहलाई केन्द्रीय बस टर्मिनल चोकको कुनामा कार्यक्रम गर्न अनुमति दिएको थियो ।

तर प्रसाई पक्षले चौबिसकोठी चोक परिक्रम गरेर बसपार्क चोकमा कार्यक्रम गर्ने अडानमा बसेपछि तनाव भएको हो । प्रहरीले चौबिसकोठी परिक्रमका लागि अनुमति दिएको थियो । तर चौबिसकोठी चोक परिक्रमा नगरी त्यहीँ कार्यक्रम गर्न खोज्दा प्रहरीले हटाएको हो ।