फागुन २१ गते हुन गइरहेको प्रतिनिधिसभा निर्वाचनका लागि नेकपा एमालेबाट गुल्मी क्षेत्र नं. २ बाट गोकर्ण विष्ट र पश्चिम नवलपरासी क्षेत्र नं. २ बाट बैजनाथ चौधरीको एकल नाम उम्मेदवारको लागि सिफारिस गरी पार्टी केन्द्रमा पठाइएको छ।

एमालेको लुम्बिनी प्रदेश कमिटीको बिहीबार बसेको सचिवालय बैठकले प्रदेशका १२ वटै जिल्लाका २६ वटा निर्वाचन क्षेत्रका लागि पार्टी केन्द्रमा उम्मेदवार नाम सिफारिस गरी पठाएको प्रदेशका एक सचिवालय सदस्यले बताए।

यसअघि लुम्बिनी प्रदेशका जिल्लाहरूबाट ८ वटा निर्वाचन क्षेत्रमा मात्र एकल नाम सिफारिस गरी पठाइएकोमा प्रदेश कमिटीबाट विष्ट र चौधरीको नाम समेत थप गरी १० वटा निर्वाचन क्षेत्रमा एकल नाम सिफारिस गरी पठाइएको ती सदस्यले बताए।

यसअघि सम्बन्धित क्षेत्रीय कमिटीबाट रूपन्देही क्षेत्र नं. २ बाट विष्णु प्रसाद पौडेल, क्षेत्र नं. ५ बाट खिमलाल भट्टराई, कपिलवस्तु क्षेत्र नंं १ बाट विश्रामप्रसाद चौधरी, क्षेत्र नं. २ बाट दृघनारायण पाण्डे, दाङ क्षेत्र नं. २ बाट शंकर पोखरेल, बाँके क्षेत्र नं. १ बाट सूर्य ढकाल, प्युठानबाट सूर्य थापा र गुल्मी क्षेत्र नं. १ बाट प्रदीपकुमार ज्ञवालीको एकल नाम सिफारिस गरिएको थियो।

गुल्मी २ नं. क्षेत्रीय कमिटीबाट विष्टको एकल नाम सिफारिस गरी पठाइएको भए पनि जिल्लाबाट डा. नागेन्द्र अर्याल, राजेन्द्र अर्याल र कृष्णप्रसाद अर्यालको नाम सिफारिस गरी प्रदेश कमिटीमा पठाइएको थियो। प्रदेशबाट भने लोकप्रियताको आधारलाई हेर्दा विष्टको एकल नाम सिफारिस गरिएको राय सहितको सिफारिस केन्द्रमा पठाएको हो।

त्यस्तै, नवलपरासी क्षेत्र नं. २ बाट चौधरी सहित श्यामकुमार बस्याल, सरिता पौडेल र भगौती प्रसाद यादवको समेत नाम सिफारिस भएकोमा जिल्ला कमिटीको राय अनुसार चौधरीको मात्र नाम सिफारिस गरी पठाइएको छ।

एमालेको ११ औं महाधिवेशनबाट उपमहासचिव बनेका विष्ट गुल्मी क्षेत्र नंं २ बाट २०५६ सालदेखि लगातार चुनाव लड्दै आएका छन्। उनी २०६४ सालमा बाहेक त्यसपछिका सबै निर्वाचनमा विजयी हुँदै आएका थिए।

लुम्बिनी प्रदेशका पूर्वमन्त्री समेत रहेका चौधरी भने ११ औँ महाधिवेशनमा सचिवमा पराजित भएका थिए।

२०६४ सालमा सोही क्षेत्रबाट संविधान सभा सदस्य निर्वाचित भएका चौधरी २०७४ सालमा लुम्बिनी प्रदेशसभा सदस्य बनेका थिए।

उनी शंकर पोखरेल नेतृत्वको सरकारका प्रवक्ता एवं भौतिक पूर्वाधार विकास मन्त्रीको जिम्मेवारी पूरा गरेका थिए। २०७९ सालको निर्वाचनमा उम्मेदवार बन्ने अवसर नपाएका चौधरी यसअघि पार्टीको पोलिटब्युरो सदस्य थिए।

क्षेत्र र जिल्लाबाट एकभन्दा बढी नाम सिफारिस गरी पटाइएकोमा प्रदेशबाट विष्ट र चौधरीको एकल नाम सिफारिस गरी पठाएको प्रदेश कमिटीले कतिपय क्षेत्रमा भने क्षेत्र र जिल्लाबाट पठाइएका नामहरूमा अरू नाम थप गरेर केन्द्रमा पठाएको छ।

दाङ क्षेत्र नं. १ बाट यसअघि रेवती रमण शर्मा, अर्जुन गुरुङ र कमला आचार्यको नाम सिफारिस गरिएकोमा प्रदेश कमिटीबाट शुरामणि बेलबासेको नाम थप गरी चार जना सिफारिस गरिएको छ।

त्यस्तै, क्षेत्र नंं ३ बाट पनि क्षेत्रीय कमिटीबाट सिफारिस गरिएका घनश्याम पाण्डे, हिराचन्द्र केसी र सीमा न्यौपाने सहित रामजी चौधरीको नाम थप गरी पठाइएको छ।

बाँके क्षेत्र नं. ३ बाट पनि क्षेत्रीय कमिटीबाट सिफारिस गरिएका दलबहादुर सुनारसँगै प्रदेश कमिटीले किस्मत कुमार कक्ष पति र दिपा शर्माको नाम थप गरी केन्द्रमा पठाएको छ। जिल्ला कमिटीले भने क्षेत्रीय कमिटीबाट सिफारिस गरिएको सुनारको नामसँगै करिम खाँन र लक्ष्मी हमालको नाम थप गरी प्रदेशमा पठाएको थियो।

त्यस्तै, प्रदेश कमिटीले अर्घाखाँचीबाट सिफारिस गरिएका पाँच जनाको नामसँगै गोपाल खनालको पनि नाम थप गरेको छ।

जिल्ला कमिटीले टोपबहादुर रायमाझी, पीताम्बर भुसाल, बिजुला रायमाझी, बोमबहादुर विश्वकर्मा र भोजबहादुर शाहको नाम सिफारिस गरी प्रदेशमा पठाएको थियो।

यसै गरी पाल्पा क्षेत्र नंं २ बाट पनि प्रदेश कमिटीले भोजराज पोखरेल (रामजी) को नाम थप गरी केन्द्रमा सिफारिस गरेको छ। यसअघि क्षेत्रीय कमिटीबाट विष्णु प्रसाद पौडेल, ठाकुर गैरे, नारायणी घिमिरे र डा. रामबहादुर राउतको नाम सिफारिस गरी प्रदेशमा पठाइएको थियो।