अनलाइनमार्फत विज्ञापन हेरेर पैसा कमाइने लोभ देखाई देशभरका हजारौँ नागरिकलाई ठगी गर्ने एउटा ठूलो गिरोहलाई प्रहरीको साइबर ब्युरोले नियन्त्रणमा लिएको छ ।

चितवनको खैरहनीमा ‘एसएमसीएन एड्भरटाइजिङ्ग सर्भिस सेन्टर’ नामक कम्पनी खोलेर वैधानिकताको भ्रम छर्दै यो समूहले करिब ७० हजार नेपालीलाई आफ्नो सञ्जालमा जोडेर ठगी गरेको खुलेको हो ।

प्रहरीका अनुसार यो समूहले ‘एसएमसी’ नामक मोबाइल एप्लिकेसनमार्फत युनिभर्सल, वार्नर ब्रदर्स र डिज्नी जस्ता विश्वप्रसिद्ध फिल्म कम्पनीका विज्ञापन हेरेबापत पैसा पाइने झुठो प्रचार गरेको थियो ।

कम्पनी रजिष्ट्रारको कार्यालयमा दर्ता भएको प्रमाणपत्र देखाएर सर्वसाधारणलाई विश्वासमा पारी उनीहरूले पिरामिड शैलीमा नेटवर्क विस्तार गरेका थिए । नयाँ सदस्य भर्ना गरेबापत आकर्षक कमिसन र दैनिक आम्दानीको प्रलोभन देखाई ठगी गर्ने यो गिरोहले पोन्जी स्किम चलाएको अनुसन्धानबाट देखिएको छ ।

हालसम्म २५५ वटा सामूहिक उजुरी परेको र त्यसका आधारमा १२ करोड ८ लाख १६ हजार ३ सय ७२ रुपैयाँ ठगी भएको तथ्याङ्क प्रहरीले सार्वजनिक गरेको छ । एउटै उजुरीमा परिवारका धेरै सदस्यहरू पीडित भएको पाइएको छ । पक्राउ परेका व्यक्तिहरूलाई संगठित अपराध निवारण ऐन, २०७० र मुलुकी अपराध संहिता, २०७४ बमोजिम काठमाडौं जिल्ला अदालतबाट म्याद थप गरी अनुसन्धान अघि बढाइएको छ ।

साइबर ब्युरोले यस प्रकरणमा ठगिएका अन्य व्यक्तिहरूलाई पनि डिजिटल प्रमाणसहित उजुरी दिन आग्रह गरेको छ । साथै, थोरै कमिसनको लोभमा आफ्नो बैंक खाता वा क्यूआर कोड अपरिचित व्यक्तिलाई प्रयोग गर्न नदिन र घरमै बसी भिडियो हेरेर पैसा कमाउने जस्ता प्रलोभनमा नफस्न सर्वसाधारणलाई सचेत गराएको छ ।