फागुन २१ मा हुने प्रतिनिधिसभा सदस्य निर्वाचनका लागि एमालेले जिल्ला अध्यक्ष पिताम्बर भुसाललाई उम्मेदवार बनाएको छ ।

२०५४ सालमा २५ वर्षको उमेरमा बाँगी गाविस अध्यक्षमा निर्वाचित भुसाल २८ वर्षपछि पहिलो पटक सांसदको चुनावमा भिड्दैछन्।

एमालेमा उनी गाउँ, इलाका, क्षेत्रीय, जिल्ला सदस्य हुँदै जिल्ला अध्यक्ष भएका हुन् । दुवै पटक निर्विरोध जिल्ला अध्यक्ष भएका उनको यो दोस्रो कार्यकाल हो।

अर्घाखाँचीका सबै निर्वाचन क्षेत्रमा एमालेले एक्लै चुनाव जितेको २०७९ को प्रतिनिधिसभा तथा प्रदेशसभा सदस्यमा पहिलो पटक हो । ०५६ मा एमाले–राष्ट्रिय जनमोर्चाबीच तालमेल गरी तत्कालीन क्षेत्र २ बाट एमालेका डा. डिल्लीराज खनाल र ०७० मा सोही क्षेत्रबाट डा. दुमनसिंह थापाले जितेका थिए । दुवै जनाले प्रतिस्प्रर्धी कांग्रेसकी पुष्पा भुसाल गौतमलाई पराजित गरेका थिए । एमाले विभाजनपछि माधव नेपालतिर लागेका थापाको दुई वर्षअघि निधन भयो । अर्थशास्क्री खनाल सत्रिय राजनीतिबाट टाढा छन्।

०७४ को चुनावमा एमाले–माओवादी तालमेल हुँदा प्रदेशसभा १ मा हालका लुम्बिनी प्रदेश सरकारका मुख्यमन्त्री चेतनारायण आचार्य र २ मा रामजीप्रसाद घिमिरे निर्वाचित भएका थिए । एमाले र माओवादीबीच पार्टी एकतापछि बनेको नेकपा भंग भएपछि २०६४, ०७०, ०७४ मा माओवादीबाट चुनाव जितेका टोपबहादुर रायमाझी पुष्पकमल दाहाललाई छाडेर केपी शर्मा ओलीतिर लागे । ०७९ को चुनावमा तिनै रायमाझी प्रतिनिधिसभामा, आचार्य प्रदेशसभा १ र घिमिरेले २ बाट निर्वाचित भए ।

कांग्रेस–माओवादीसहितको पाँच दलीय गठबन्धनका उम्मेदवारलाई हराउँदै एमालेले तीनवटै निर्वाचन क्षेत्रमा जिताउन भूमिका खेलेको भन्दै एमाले अध्यक्ष भुसाललाई काठमाडौंमा ओलीले कार्यक्रम गरेरै विशेष सम्मान गरेका थिए ।

२०४१ सालमा आदर्श मावि खनदहमा पढ्दै गर्दा राजनीतिक यात्रा सुरु गरेका भुसाल २०५४ मा एमाले जिल्ला कमिटी सदस्य हुँदै अध्यक्षमा रहेका उनी सामाजिक काममा सक्रिय छन् ।

यसपाली उम्मेद्वारका लागि जिल्लाबाट उनीसँगै टोपबहादुर रायमाझीसहित पाँच जनाको नाम सिफारिस भएको थियो । एमाले लुम्बिनी प्रदेश कमिटीले गोपाल खनालको नाम थपेको थियो । रायमाझी भुटानी शरणार्थी प्रकरणमा अनुसन्धानका लागि दुई वर्षदेखि थुनामा छन् । मुख्यमन्त्री आचार्यले चुनाव नलड्ने भएपछि भुसाल उम्मेदवार बनेका हुन् ।