काठमाडौँ । नेपाली कांग्रेसको आइतबारदेखि सुरु हुने दोस्रो विशेष महाधिवेशन आयोजक समितिले आफ्नो पक्षमा ६० प्रतिशत महाधिवेशन प्रतिनिधि उभिएको दाबी गरेको छ।

शनिबार काठमाडौँको भृकुटीमण्डपमा आयोजित पत्रकार सम्मेलनमा आयोजक समितिले विशेष महाधिवेशनको समर्थनमा प्रतिनिधिको संख्या उल्लेख्य रूपमा बढेको जनाएको हो। कांग्रेस केन्द्रीय सदस्य अजयबाबु शिवाकोटीले विशेष महाधिवेशनको मागका क्रममा सुरुमा ५४.५८ प्रतिशत महाधिवेशन प्रतिनिधिको हस्ताक्षर संकलन भएको भए पनि हाल त्यो संख्या ६० प्रतिशत पुगेको दाबी गरे।

उनका अनुसार २ हजार ४ सय ८८ प्रतिनिधिको हस्ताक्षरबाट सुरु भएको अभियानमा अहिले विभिन्न जिल्लाबाट थप प्रतिनिधि खुल्दै आएका छन्। तनहुँ, झापा, धनुषा, रुपन्देही, मनाङलगायत जिल्लामा प्रतिनिधिहरू खुलेर विशेष महाधिवेशनको पक्षमा उभिएकाले समर्थनको संख्या बढेको शिवाकोटीको भनाइ छ।

पार्टी विधानमा भएको व्यवस्थालाई कार्यान्वयन गर्न विशेष महाधिवेशन आवश्यक रहेको उल्लेख गर्दै उनले यसले पार्टी फुटाउने होइन, झनै बलियो बनाउने दाबी गरे।

आयोजक समितिले विशेष महाधिवेशनको उद्घाटन समारोहका प्रमुख अतिथिका रूपमा सभापति शेरबहादुर देउवालाई निमन्त्रणा दिइएको जनाएको छ। साथै विशेष महाधिवेशनको पक्षमा नउभिएका नेता तथा केन्द्रीय सदस्यहरूलाई पनि उद्घाटन समारोहमा निमन्त्रणा गरिएको छ।

विशेष महाधिवेशनको उद्घाटन भृकुटीमण्डपमा आइतबार दिउँसो १ बजे हुने कार्यक्रम तय गरिएको छ।