२६ पुस, काठमाडौं । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले प्रतिनिधिसभाको आउँदो निर्वाचन रुकुम पूर्वबाट लड्ने घोषणा गरेका छन्।

रुकुम पश्चिममा जारी नेकपाको एकता सन्देश सभालाई सम्बोधन गर्दै प्रचण्डले आगामी चुनाव रुकुम पूर्वबाट उम्मेदवार बन्ने स्पष्ट पारे। “अहिलेको चुनाव रुकुमबाटै लड्छु। म पूर्वी रुकुमबाट लड्ने छु,” उनले भने, “पूर्वी रुकुमबाट चुनाव लड्ने भनेपछि पश्चिम रुकुम पनि आइरहन्छु भन्ने बुझिराख्नु भएको होला।”

उनले पश्चिम रुकुमका जनताले देखाएको विश्वास र अपेक्षा पूरा गर्न आफू प्रतिबद्ध रहेको उल्लेख गर्दै विकास निर्माणका कामलाई नयाँ ढंगले अघि बढाउने र रुकुमका जनताको दुःख–सुखमा सधैं साथ रहने प्रतिबद्धता व्यक्त गरे।

यसअघि २१ फागुनमा हुने प्रतिनिधिसभा सदस्य निर्वाचनमा प्रचण्ड कहाँबाट उम्मेदवार बन्ने भन्ने विषय खुलिसकेको थिएन। उनलाई करिब आधा दर्जन जिल्लाबाट उम्मेदवार बन्ने सिफारिस आएको थियो।