नेपाली कांग्रेसका मुख्यसचिव कृष्णप्रसाद पौडेलले बिहीबार पदबाट राजीनामा दिएका छन्। निर्वाचन क्षेत्रमा काम गर्नका लागि आफूले बिहीबार पदबाट राजीनामा दिएको पौडेलले जानकारी दिए । 

पौडेल कांग्रेसको पुस २७ देखि ३० गतेसम्म भएको विशेष महाधिवेशनको विपक्षमा थिए । तत्कालीन संस्थापन शेरबहादुर देउवा समूह र डा. शेखर कोइराला समूह पनि विशेष महाधिवेशनको विपक्षमा थियो । 

तत्कालीन महामन्त्रीद्वय गगन थापा र विश्वप्रकाश शर्माको अगुवाइमा भएको विशेष महाधिवेशनलाई निर्वाचन आयोगले मान्यता दिएको थियो । 

आयोगको मान्यताविरुद्ध सर्वोच्च अदालतमा गएको देउवा समूहले अन्तरिम आदेश नपाएपछि विशेष महाधिवेशनबाट सभापतिमा चयन भएका गगन थापा नेतृत्वको समूह शुक्रबार पार्टी केन्द्रीय कार्यालय सानेपामा जाँदै छ । त्यसको अघिल्लो दिन पौडेलले पदबाट राजीनामा दिएका हुन् । 

पौडेललाई १३ औँ महाधिवेशनबाट देउवा कांग्रेस सभापतिमा निर्वाचित भएपछि मुख्यसचिव नियुक्त गरेका थिए ।  पौडेल राष्ट्रिय सभाका सांसद छन् ।

शुक्रबार विशेष महाधिवेशनबाट आएको केन्द्रीय कार्यसमितिको बैठक पार्टी कार्यालय सानेपामा बस्दैछ । त्यो बैठकबारे सूचना सचिव प्रकाश शर्माले निकालेका छन् ।