जिल्ला प्रहरी कार्यालय सुर्खेतले लेकबेँसी नगरपालिकाबाट भरुवा बन्दुक सहित एक व्यक्तिलाई नियन्त्रणमा लिएको छ । पक्राउ पर्नेमा लेकबेँसी नगरपालिका–९ सिम दमारका ३८ वर्षीय धन बहादुर रावत रहेका छन् ।

जिल्ला प्रहरी कार्यालय सुर्खेतका प्रमुख तथा प्रहरी उपरीक्षक (एसपी) सुधीरराज शाहीका अनुसार, रावतलाई प्रहरी टोलीले बुधबार बिहान ११ः३० बजेको समयमा नियन्त्रणमा लिएको हो ।

इलाका प्रहरी कार्यालय लेकबेँसीबाट खटिएको प्रहरी टोलीले लेकबेँसी–९ सिम दमार क्षेत्रको बाटोमा हिँडिरहेको अवस्थामा रावतको साथबाट एक थान भरुवा बन्दुक फेला पारेको थियो । प्रहरीले उनलाई बन्दुकसहित तत्काल नियन्त्रणमा लिएको हो ।

अवैध हतियारसहित पक्राउ परेका रावतलाई हाल जिल्ला प्रहरी कार्यालय सुर्खेतमा राखिएको छ । उनीमाथि हातहतियार तथा खरखजाना सम्बन्धी कसुरमा थप अनुसन्धान प्रक्रिया अगाडि बढाइएको प्रहरी प्रमुख शाहीले बताए ।