६० केजी सुन तस्करी सम्बन्धी मुद्दामा चौथो पटक सुनुवाइ स्थगित भएको छ । बुधबार सर्वोच्च अदालतका नन्यायाधीशद्वय कुमार रेग्मी र मेघराज ढकालको इजलासमा सुनुवाइका लागि पेसी तोकिएकोमा मुद्दाका प्रत्यार्थीका कानुन व्यवसायीले स्थगित गराएका हुन् ।

सुन तस्करी प्रकरणमा जोडिएका चिनियाँ नागरिक गेन्जा झाछी, मिङसिङ टेरेन्स सी, मनोजराज श्रेष्ठ, भारतीय नागरिक बैजनाथ ब्रह्मादत्त गोयलले दिएको निवेदनमा चार पटक पेसी तोकेर पनि सुनुवाइ हुन सकेन ।

यसअघि २०८१ चैत १५ मा पहिलो पटक न्यायाधीशद्वय कुमार चुडाल र नृपध्वज निरौलाको संयुक्त इजलासमा पेसी तोकिएकोमा निवेदक पक्षका कानुन व्यवसायीले स्थगित गराएका थिए । २०८२ वैशाख ५ गते तोकिएको पेसीमा निवेदकतर्फबाट स्थगित गराइएको थियो भने जेठ २ गते दुवै पक्षबाट सुनुवाइ स्थगित गरेको थियो ।

२०८१ असार २६ गते सुन तस्करी प्रकरणमा काठमाडौँ जिल्ला अदालतले पुर्पक्षका लागि थुनामा पठाउने आदेश दिएको थियो । उच्च अदालत पाटनले पनि जिल्ला अदालतको आदेश सदर गरेपछि उनीहरू दफा ७३ को निवेदन लिएर सर्वोच्च पुगेका हुन् ।

चिनियाँ गिरोहले मोटरसाइकलको ब्रेक सुको स्वरूपमा भित्र्याएको ६० किलोभन्दा बढी सुन त्रिभुवन अन्तर्राष्ट्रिय विमानस्थलको भन्सार जाँचपास भएर बाहिरिँदै गरेको अवस्थामा राजस्व अनुसन्धान विभागले २ साउन २०८० मा सुन बरामद गरेको थियो ।