सुर्खेत — कर्णाली प्रदेशका मुख्यमन्त्री यामलाल कँडेलले भेरी–बबई डाइभर्सन बहुउद्देश्यीय आयोजनालाई ‘समस्याग्रस्त आयोजना’ बन्न नदिन संघीय सरकारले विशेष पहल गर्नुपर्ने बताएका छन्।

मुख्यमन्त्री कँडेल शुक्रबार आयोजनास्थल बबई पुगेर आयोजनाका प्रमुख र निर्माण व्यवसायीसँग स्थलगत अवलोकन तथा छलफल गरेका थिए। उनले आयोजनाको हालको कार्यगतिसँगै थपिएको समयमा पनि काम करिब ६० प्रतिशत मात्र सम्पन्न भएको जानकारी पाएपछि चिन्ता व्यक्त गरेका छन्।

कँडेलले भने, “थपिएको समयमा पनि काम यस गतिमा रहे अर्को चार वर्षमा पनि आयोजना सम्पन्न हुने देखिँदैन। संघीय सरकारले पर्याप्त पहल गर्नुपर्ने आवश्यक छ।”

आयोजनास्थलका प्रमुख सुरेन्द्र पौडेलले कार्यप्रगति अपेक्षाभन्दा कमजोर रहेको र अतिरिक्त समयमा पनि काम सम्पन्न हुन नसक्ने जानकारी दिएका छन्। आयोजनामा अझै १० उच्च तहका प्राविधिक पद रिक्त छन्, जसले कामको गतिमा असर पारिरहेको छ।

आयोजनाले भेरी नदीको पानी १२.२ किलोमिटर सुरुङमार्फत बर्दियाको बबई नदीमा पुर्‍याउनेछ, जसबाट ४६.६ मेगावाट विद्युत् उत्पादन र बाँके–बर्दियाका करिब ५१ हजार हेक्टर जमिनमा सिँचाइ सुविधा प्रदान हुने लक्ष्य राखेको छ।

आयोजनाको पहिलो चरणअन्तर्गत सुरुङ निर्माण चिनियाँ कम्पनी कोभेकले तोकिएको समयभन्दा एक वर्ष अघि नै सम्पन्न गरेको थियो, तर दोस्रो चरणको काम पछिल्ला वर्षमा सुस्त गतिमा भइरहेको छ।