काठमाडौँ – धनुषा, सिन्धुली, रुकुम पूर्व र बाजुरा जिल्लामा भएका सवारी दुर्घटनामा ८ जनाको मृत्यु भएको छ।

धनुषा, गणेशमान चारनाथ नगरपालिकाको बिरेन्द्रबजारमा शनिबार साँझ बस र अटोको भिडन्तमा अटोमा सवार ४ जनाको मृत्यु भएको छ। मृतकमा ४० वर्षीय धनबहादुर पूर्वछाने मगर, ३५ वर्षीया निशा मगर, ३५ वर्षीय शम्भु पूर्वछाने मगर र अटो चालक ४० वर्षीय डमर राई छन्। घाइते अन्य २ जनाको उपचार न्युरो अस्पताल जनकपुरमा भइरहेको छ। बस चालकलाई प्रहरीले नियन्त्रणमा लिएको छ।

सिन्धुलीको सुनकोसी गाउँपालिका–६ पुछिघाट पुलमा शनिबार राति ट्याक्टर अनियन्त्रित भई दुर्घटना हुँदा २२ वर्षीय डिलबहादुर माझीको मृत्यु भएको छ। घाइते उनको शुभ जीवन अस्पताल खुर्कोटमा उपचारको क्रममा निधन भएको हो।

रुकुम पूर्वको भूमे गाउँपालिका–१ स्यावालमा शनिबार साँझ अटो दुर्घटना हुँदा ३० वर्षीया रेजिना घर्ती र २५ वर्षीया सविता घर्तीको मृत्यु भएको छ। घाइतेहरूको जिल्ला अस्पताल रुकुमकोटमा उपचारका क्रममा निधन भएको प्रहरीले जनाएको छ। अटो चालकलाई नियन्त्रणमा लिइएको छ।

त्यस्तै, बाजुराको बुढीनन्दा नगरपालिका–७ सास्थास्थित सडकमा शनिबार दिउँसो बस दुर्घटनामा २४ वर्षीय गणेश जोशीको मृत्यु भएको छ। बसमा अन्य १४ जना घाइते भएका छन् जसमा ८ जनाको उपचार नवजीवन अस्पताल धनगढी, ५ जनाको जिल्ला अस्पताल मार्तडी र १ जनाको कोल्टी अस्पतालमा भइरहेको छ। बस चालक फरार रहेको प्रहरीले जनाएको छ।

प्रहरीले सबै दुर्घटनाको अनुसन्धान अघि बढाइरहेको छ र सवारी चालकहरुलाई नियन्त्रणमा लिने प्रयास जारी राखेको छ।