काठमाडौँ । सुरक्षण मुद्रण केन्द्रले सोमबारदेखि सवारी चालक अनुमति पत्र (लाइसेन्स) छपाइ सुरु गर्ने भएको छ । यातायात व्यवस्था विभागका अनुसार दैनिक कम्तीमा ५०० को दरले छपाइ हुनेछ ।

विभागका निर्देशक नरहरि तिवारीले रातोपाटीसँग भने, ‘सुरक्षण मुद्रण केन्द्रले बनेपामा छपाइ गरेर विभागलाई हस्तान्तरण गर्नेछ । यसपछि विभागले चालकलाई वितरण गर्छ ।’ 

यातायात व्यवस्था विभागले करिब २५ लाख सवारी लाइसेन्स छाप्न बाँकी रहेको जनाएको छ । यीमध्ये १२ लाख केन्द्रले छाप्ने भएको छ । केन्द्रले ३ देखि ६ महिनामा १२ लाख लाइसेन्स छापेर विभागलाई हस्तान्तरण गर्ने तिवारीले बताए । 

यसअघि यातायात व्यवस्था विभागले छाप्दै आएको लाइसेन्समा चिप जडान गरिएको थियो । अब भने सुरक्षण मुद्रण केन्द्रबाट छपाइ हुने स्मार्ट सवारी चालक अनुमति पत्र (लाइसेन्स) मा चिपको सट्टा क्यूआर कोड प्रयोग हुनेछ । केन्द्रका उपसचिव गोपालराज तिमिल्सिनाले नयाँ लाइसेन्सको स्वरूप परिवर्तन हुने र त्यसमा क्यूआर कोड प्रविष्ट गर्ने बताएका छन् 

‘कार्ड स्मार्ट नै हो, तर त्यसमा चिप हुँदैन, क्यूआर कोड हुन्छ,’ तिमिल्सिनाले भने । केन्द्रबाट छाप्न लागिएको लाइसेन्स पनि स्मार्ट कार्ड नै हुने उनको भनाइ छ ।

यस्तै सवारी लाइसेन्स छपाइको खर्च यातायात व्यवस्था विभागले व्यहोर्ने बताइएको छ । केन्द्रले एउटा लाइसेन्स छाप्दा लगभग १९५.१७ रुपैयाँ (करबाहेक) लागत अनुमान गरेको छ । यो लागत अनुसारको बजेट विभागले केन्द्रलाई उपलब्ध गराउने समझदारी भएको छ ।लाइसेन्स छपाइका लागि गत बुधबार यातायात व्यवस्था विभागका महानिर्देशक राजीव पोखरेल र केन्द्रका कार्यकारी निर्देशक देवराज ढुङ्गानाबिच समझदारी पत्रमा हस्ताक्षर भएको थियो । यातायात व्यवस्था विभागले सेवा प्रवाह गर्न परीक्षण थालेको छ । आजसम्म विभागको सर्भर डेटा लगायत प्रविधि परीक्षण सकिने विभागले जनाएको छ ।

विभागका निर्देशक नरहरि तिवारीले द्रुत गतिमा परीक्षण भइरहेको बताए । ‘आज प्राविधिक परीक्षण गरिरहेका छौं । सबै जना सशक्त रुपमा लाग्नुभएको छ । परीक्षणपछि तत्काल के-के सेवा दिन सकिन्छ थाहा हुन्छ,’ उनले भने । 

यसअघि विभागले अत्यावश्यक सवारी लाइसेन्स छापेर वितरण गर्दै आएको थियो । करिब २५ लाख चालकको सवारी लाइसेन्स छापेर वितरण गर्न सकेको थिएन । यसमाथि जेनजी आन्दोलनका क्रममा लाइसेन्स छाप्ने मेसिन ध्वस्त बनेपछि लाइसेन्स छपाइ अनिश्चितकालका लागि बन्द गरियो । गत भदौ २३ र २४ को जेनजी आन्दोलनका क्रममा यातायात व्यवस्था विभाग तोडफोड तथा आगजनीबाट पूर्ण रूपमा ध्वस्त भएको थियो । त्यसक्रममा सवारी लाइसेन्स छपाइ मेसिन पनि पूर्णरूपमा क्षति पुगेको थियो । 

जसकारण वैदेशिक रोजगारीका लागि विदेश जाने श्रमिक तथा अत्यावश्यक सवारी लाइसेन्स आवश्यक सेवाग्राही मर्कामा परेका छन् । अब भने विभागले सेवा प्रवाह अघि बढाउने शीघ्र तयारी गरेको छ