भैरहवा, २० कात्तिक – गतिशील लोकतान्त्रिक पार्टीका संस्थापक तथा बुद्ध एयरका कार्यकारी अध्यक्ष वीरेन्द्रबहादुर बस्नेतले गौतमबुद्ध अन्तर्राष्ट्रिय विमानस्थललाई काठमाडौंको वैकल्पिक र अन्तर्राष्ट्रिय हब विमानस्थलका रूपमा विकास गर्ने योजना सार्वजनिक गरेका छन्।

बिहीबार पार्टीको आयोजनामा सार्वजनिक पर्यटन अवधारणामा बस्नेतले अब काठमाडौंले सबै अन्तर्राष्ट्रिय उडान सम्हाल्न नसक्ने भएकोले भैरहवामा ट्राफिक ल्याउनु अपरिहार्य भएको बताए। युरोपेली विमान निर्माता कम्पनी एयरबससँगको सहकार्यमा गरिएको अध्ययनले लामो दूरीका उडान सम्भव भएको पुष्टि गरेको जानकारी उनले दिएका छन्।

बस्नेतले नेपाल वायुसेवा निगम (नेवानि) को सुधार र पुनरुत्थान आवश्यक भएको भन्दै, ६ महिनाभित्र नेवानिलाई सुधारको बाटोमा लैजान सकिने बताए। उनले नेवानिलाई कम्तीमा ५० जहाजसहित पब्लिक कम्पनी बनाउने र भैरहवालाई हब विमानस्थलमा परिणत गर्ने योजना रहेको बताए।

उनले भने, “इथियोपियाले १ सय जहाज उडाउन सक्छ, हामी किन सक्दैनौं,” र व्यवस्थापन सुधारमार्फत नेवानिलाई विश्वकै उत्कृष्ट वायुसेवा कम्पनी बनाउने लक्ष्य राखेको बताए।