१५ कात्तिक, मकवानपुर — अविरल वर्षाका कारण मकवानपुरको इन्द्रसरोवर गाउँपालिका–३ ज्यामिरेमा पहिरो खस्दा कुलेखानी–सिस्नेरी–दक्षिणकाली सडकखण्ड अवरुद्ध भएको छ।

कात्तिक १४ गतेदेखि लगातार परिरहेको वर्षाका कारण शनिबार साँझ गएको पहिरोले सडक पूर्ण रूपमा बन्द बनेको जिल्ला प्रहरी कार्यालय मकवानपुरले जनाएको छ। सडक अवरुद्ध भएपछि काठमाडौं–हेटौँडा आवागमन पूर्ण रूपमा ठप्प भएको छ।

सडक बन्द हुँदा काठमाडौंबाट हेटौँडा र हेटौँडाबाट काठमाडौं जाँदै गरेका सवारीसाधनहरू बीच बाटोमै रोकिएका छन्। मकवानपुर प्रहरीका अनुसार पहिरो खसेको स्थानमा डोजर र जनशक्ति परिचालन गरी बाटो खुलाउने प्रयास भइरहेको छ।

तर, लगातारको वर्षाका कारण माटो भिजेको र ढुंगामाटो झर्ने क्रम नरोकिएकाले बाटो खुलाउन कठिनाइ भइरहेको प्रहरीले जनाएको छ। मौसम अनुकूल बनेपछि मात्रै सडक सुचारु गर्न सकिने अनुमान गरिएको छ।

प्रहरीले यात्रुहरूलाई आवश्यक नपरी यो सडक प्रयोग नगर्न र वैकल्पिक मार्ग अपनाउन आग्रह गरेको छ।