प्रदेश सरकारले चिकित्सकको समयमै व्यवस्था नगर्दा बेनीस्थित प्रादेशिक अस्पतालमा स्त्री तथा प्रसूतिरोग विशेषज्ञ अभाव भएको र शल्यक्रियामार्फत हुने प्रसूति सेवा बन्द भएको छ । वर्षेनि १२०–१५० गर्भवतीले सेवा लिने यो अस्पतालमा चिकित्सकले राजीनामा दिएपछि गर्भवतीहरूलाई बागलुङ वा पोखरा लैजानुपर्ने बाध्यता बनेको छ ।

विज्ञापन गरे पनि विशेषज्ञ नआएको बेनी अस्पतालका निमित्त प्रमुख डा. रामु सापकोटाले जनशक्ति अभावले अन्य शल्यक्रिया सेवा पनि प्रभावित भएको बताए । गण्डकी प्रदेशका सबै जिल्लाका अस्पताल व्यवस्थापन समिति नेतृत्वविहीन हुँदा समस्याहरू झनै बढेका छन् ।

प्रदेशसभा सदस्य हरिबहादुर भण्डारीले स्वास्थ्यमन्त्रीलाई समस्या समाधानका लागि ध्यानाकर्षण गराएका छन् । बेनी अस्पतालले अन्य स्वास्थ्य सेवा नियमितै दिँदै आएको छ जहाँ वार्षिक ६० हजारभन्दा बढीले उपचार लिन्छन् ।