काठमाडौं। राष्ट्रिय स्वतन्त्र पार्टी परित्याग गरेका सन्तोष परियार, प्रगतिशील राष्ट्रिय अभियानका संयोजक सुदन किराती र नेपाल समाजवादी पार्टी नयाँ शक्तिकी संयोजक दुर्गा सोबबीच पाँच बुँदे सहमतिमा हस्ताक्षर भएको छ।

ललितपुरमा भएको लामो वार्तापछि आगामी दिनमा सहकार्य गर्दै राजनीतिक रूपमा एकीकृत हुँदै अघि बढ्ने सहमति बनेको हो।

सहमतिको पत्रअनुसार नेपाल समाजवादी पार्टी नयाँ शक्ति, प्रगतिशील राष्ट्रिय अभियान र प्रतिनिधिसभाका निवर्तमान सदस्य सन्तोष परियार देशको समग्र राजनीतिक पुनर्संरचना गर्ने साझा लक्ष्यसहित एकमत भएका छन्।

सहमतिको दोस्रो बुँदामा एकता तथा ध्रुवीकरणका लागि बन्ने एकीकृत पार्टीको नाम र चुनाव चिन्ह एउटै राखिने उल्लेख छ। साथै, मङ्सिर ७ गते बृहत् एकता घोषणा कार्यक्रम गर्ने सहमति भएको छ।

चौथो बुँदामा देश–विदेशमा रहेका प्रगतिशील, लोकतान्त्रिक, वामपन्थी तथा देशभक्त शक्ति र विशेषगरी जे–नजी पुस्तालाई राजनीतिक पुनर्संरचनाको अभियानमा सहभागी हुन आह्वान गरिएको छ।

यद्यपि सहमतिपत्रमा माओवादी छोडेका उपमहासचिव जनार्दन शर्मा ‘प्रभाकर’ को नाम उल्लेख गरिएको छैन, सहमति दौरान उनी र नेता बाबुराम भट्टराई दुवैको उपस्थिति रहेको स्रोतले बताएको छ। जनार्दनले सुदन किरातीलाई अगाडि सारेर पाँच बुँदे सहमति गराएको बताइएको छ।