काठमाडौं, कात्तिक १ —नेकपा एमालेका अध्यक्ष केपी शर्मा ओलीले उनकी पार्टीले देशमा शान्ति, सुशासन र भ्रष्टाचार नियन्त्रण गरेरै छाड्ने दाबी गरेका छन्।

शनिबार ललितपुरको च्यासलस्थित पार्टी केन्द्रीय कार्यालयमा आयोजित चियापान समारोहलाई सम्बोधन गर्दै अध्यक्ष ओलीले वर्तमान सरकारप्रति आक्रोश पोख्दै एमालेले देशको अवस्थालाई सुधारेकै छाड्ने बताए।

“सरकारलाई रिस उठोस् कि नउठोस्, नेकपा एमाले पनि यो देशमा छ। शान्ति, सुशासन स्थापना गरिछाड्छ, भ्रष्टाचार नियन्त्रण गरिछाड्छ,” उनले उद्घोष गरे।

सरकारलाई ‘अस्वस्थता फैलाउनेहरूप्रति मौन’ रहेको आरोप लगाउँदै ओलीले भने, “आफ्नो खुसी र सुविधाका लागि अर्काको सम्पत्ति लुट्ने, कस्तो रिस हो? कस्तो संस्कृति हो? अस्वस्थता फैलाउनेहरूसँग सरकारलाई रिस उठ्दैन।”

ओलीको टिप्पणी पछिल्लो समय देशमा फैलिएको अस्थिरता, भ्रष्टाचार र शासकीय निष्क्रियताप्रति लक्षित देखिएको छ।
कार्यक्रममा एमालेका शीर्ष नेताहरू, सांसद, कूटनीतिक निकायका प्रतिनिधि तथा विभिन्न सामाजिक क्षेत्रका व्यक्तिहरूको उपस्थिति रहेको थियो।