काठमाडौं, कात्तिक ११ — जेनजी आन्दोलनको क्रममा कोटेश्वर प्रहरी प्रभागमा कार्यरत सहायक हवल्दार अमृत गुरुङको हत्या क्रिकेट प्रशिक्षण लिएका व्यक्ति मार्फत भएको खुलेको छ। पक्राउ परेका १९ वर्षीय अनुपम भण्डारी कैलालीको लम्मीचुहा–४ का स्थानीय हुन्।

काठमाडौं उपत्यका अपराध अनुसन्धान कार्यालयको टोलीले भण्डारीलाई कैलालीबाट पक्राउ गरेर काठमाडौं ल्याएको थियो। अनुसन्धानका अनुसार भण्डारी करिब तीन महिनाअघि भारतको बैंगलोरमा क्रिकेट प्रशिक्षण लिएर फर्केका थिए। ग्रेट हिमालयन क्रिकेट एकेडेमी, शान्तिनगरमा भर्ना भएर क्रिकेट सिकिरहेका उनी जेनजी आन्दोलनको केही दिनअघि मात्र काठमाडौं आएका थिए।

भण्डारीले बयानमा २३ भदौमा सुरक्षाकर्मीको गोली लागेर विद्यार्थीहरू मारिएपछि रिस उठेको र त्यसैको प्रभावमा २४ भदौमा सहायक हवल्दार गुरुङमाथि आक्रमण गरेको बताएका छन्। उनले प्रहरीमाथि चक्कु प्रहार गरेको र अन्य आन्दोलनकारीहरूले पछि उनलाई घिसार्दै लगेको पनि उल्लेख गरेका छन्।

घटनामा प्रयोग भएका कपडा प्रहरीले भण्डारीको घरबाट बरामद गरेको छ। उनका अनुसार आक्रमणको क्रममा १३ जना प्रहरी घाइते भएका थिए भने प्रभागमा व्यापक तोडफोड र आगजनी भएको थियो।

सहायक हवल्दार गुरुङले हत्या हुनु अघि मात्र आमा गुमाएका थिए र उनका ७ महिनाका छोरा, श्रीमती तथा ६० वर्षीय पिता थिए। जेनजी आन्दोलनका क्रममा ३ प्रहरीसहित ७६ जनाको मृत्यु भएको थियो।

काठमाडौं जिल्ला अदालतमा भण्डारी विरुद्ध कर्तव्य ज्यान र ज्यान मार्ने उद्योगको आरोपमा मुद्दा दर्ता गरिएको छ।