काठमाडौं,  कात्तिक ९  — ‘राष्ट्र, राष्ट्रियता, धर्म संस्कृति र नागरिक बचाउ महाअभियान’ सञ्चालन गर्दै आएका व्यवसायी दुर्गा प्रसाईंले आफू सुधारिन तयार भएको बताएका छन्। आइतबार काठमाडौंमा पत्रकार सम्मेलन गर्दै उनले आवश्यक परे देश छोड्न समेत तयार रहेको बताएका हुन्।

प्रसाईंले भने, “तपाईंहरूले भन्नुभयो भने — दुर्गा तँ देश छोडेर जा, तेरो कारणले सबै बिग्रियो भने पनि म रेडी छु, म जान्छु। मलाई लोभ छैन, मलाई केही चाहिँदैन।”

उनले आफू २०५७ सालदेखि नेकपा माओवादी हुँदै एमाले र अहिले राजसंस्था पक्षधर अभियानमा आइपुगेको उल्लेख गर्दै अब देशको हितका लागि सकारात्मक भूमिका खेल्ने बताएका छन्।
“हिजो जे भयो–भयो, हामी बाटो बिर्सियौं। अब त देश जोगाउनुपर्छ। नेपाल भुंग्रोमा गएको छ, त्यसलाई उठाएर न्यानो ठाउँमा लैजाऔं,” प्रसाईंले भने।

पत्रकार सम्मेलनमा उनले आफू “रेण्डम टाइपको मान्छे” भएको भन्दै मूलधारका मिडियाले कहिल्यै आफूलाई सकारात्मक रूपमा नदेखाएको गुनासो गरे।
“मेनस्ट्रिम मिडियाले मेरो राम्रो कहिल्यै लेखेन, सधैं नराम्रो मात्रै लेख्यो,” उनले भने, “तर म अब सुध्रिनेछु, देशको पक्षमा लाग्नेछु।”

गत चैत १५ गते काठमाडौंको तिनकुनेमा प्रसाईंको नेतृत्वमा राजसंस्था पुनर्स्थापनाको पक्षमा भएको प्रदर्शन हिंसात्मक बनेको थियो। त्यसपछि उनी भारततिर भागेका थिए र प्रहरीद्वारा पक्राउ परेर नेपाल ल्याइएका थिए। जिल्ला अदालतले उनलाई पुर्पक्षका लागि थुनामा पठाए पनि उच्च अदालतले पछि रिहा गरेको थियो।

प्रसाईंले कात्तिक १५ पछि पुनः प्रदर्शन गर्ने घोषणा गरेका छन्। तर गृह मन्त्रालयले आन्दोलन नगर्न आग्रह गर्दै वार्ताका लागि उनलाई बोलाएको छ।

वार्ताको निम्तोपछि आइतबार सामाजिक सञ्जाल फेसबुकमार्फत उनले सरकारी पहलको स्वागत गर्दै भनेका छन्, “जनताको आवाज सुन्ने प्रयास भएको छ, त्यसलाई स्वागत गर्छु।”

प्रसाईंले पत्रकार सम्मेलनमा पुनः जोड दिए — “अब देश बनाउनका लागि सबै सुध्रिनुपर्छ, म पनि सुध्रिन्छु।”