काठमाडौं, कात्तिक ९ – गत भदौ २४ गते जेन-जीका नाममा भएको विध्वंसक आन्दोलनका क्रममा प्रहरी अधिकारीहरूको हत्या घटनामा संलग्न भएको आरोपमा १० जना पक्राउ परेका छन्।

जिल्ला प्रहरी परिसर काठमाडौंका प्रवक्ता एसपी पवनकुमार भट्टराईका अनुसार पछिल्लो पटक पक्राउ परेका पाँचजनासहित हिरासतमा रहेका व्यक्तिको संख्या १० पुगेको हो। पछिल्लो रूपमा पक्राउ पर्नेमा गोरखाका २१ वर्षीय सोमबहादुर गुरुङ, तनहुँका २१ वर्षीय राजीव गुरुङ, युनिक श्रेष्ठ, सर्लाहीका १७ वर्षीय सुमित तितुङ र रामेछापका १६ वर्षीय दीपक मगर रहेका छन्।

यसअघि असई मिलन राय र प्रहरी जवान उत्तम थापाको हत्या अभियोगमा सिन्धुपाल्चोकका ६२ वर्षीय होमप्रसाद पौडेल, उदयपुरका २८ वर्षीय टीकाराम विक, काभ्रेका २८ वर्षीय युवराज क्याप्छाकी र मकवानपुरका २१ वर्षीय सोनाम तामाङ (बुद्धिलाल थिङ) पक्राउ परेका थिए। ती चारै जनालाई कर्तव्य ज्यान र आपराधिक उपद्रवको मुद्दामा पुर्पक्षका लागि कारागार चलान गरिएको छ।

भदौ २४ गतेको आन्दोलनका क्रममा प्रहरी प्रभाग कोटेश्वरका हवलदार अमृत गुरुङको पनि हत्या गरिएको थियो। उक्त हिंसात्मक आन्दोलनमा २२ जना प्रदर्शनकारी, १० जना कैदी र तीनजना प्रहरीको ज्यान गएको थियो। अन्य ४१ जना लुटपाट र तोडफोडका क्रममा जलेर, लडेर वा अन्य कारणले मृत्यु भएको प्रहरीले जनाएको छ।

प्रहरीका अनुसार पक्राउ परेकामाथि थप अनुसन्धान जारी छ र घटनामा संलग्न अन्य व्यक्तिहरूको खोजी तीव्र पारिएको छ।