विप्लव नेतृत्वको नेकपाले दर्ता गर्यो दल, प्रवक्ता प्रकाण्डद्वारा ऐतिहासिक दिनको दाबी
काठमाडौँ। नेत्रविक्रम चन्द (विप्लव) नेतृत्वको दल नेकपाले मंगलबार निर्वाचन आयोगमा दल दर्ताको निवेदन दिएको छ। प्रवक्ता खड्गबहादुर विश्वकर्मा (प्रकाण्ड) ले पत्रकार सम्मेलनमा आजको दिन नेपालको राजनीतिमा ऐतिहासिक र विशेष दिन सावित भएको दाबी गरेका छन्।
उनले दल दर्ताको लागि ‘कम्युनिस्ट पार्टी नेपाल’ नाम प्रस्ताव गरिएको जानकारी दिए। पहिलोपटक संसदीय प्रणालीमा चुनावमा भाग लिएको दिन भएकाले आजको दिन ऐतिहासिक भएको उनका तर्क हुन्।
प्रकाण्डले झण्डै ११ वर्षदेखि आफ्नो पार्टी देश र जनताको पक्षमा काम गर्दै आएको उल्लेख गर्दै भने, “जनताको चाहनालाई कुनै अवरोधबिना फैसला गर्न सकिने विधि निर्वाचन हो। राजनीतिक, परिवर्तन र क्रान्तिको आन्दोलनमा नयाँ दृष्टिकोण र नीति अघि सारेको हाम्रो प्रयास हो।”
उनले पार्टीले जनताको अधिकार, मुद्दा र चाहनालाई आफैं निर्णय गर्ने लोकतान्त्रिक विधिको पक्षमा रहेको पनि बताए। उनका अनुसार विगतका अनुभव र वर्तमान आवश्यकतालाई ध्यानमा राख्दै पार्टीले नयाँ रणनीति र नीतिसहित चुनावमा सहभागिता जनाउने तयारी गरेको छ।
