पतञ्जलि योगपीठ तथा आयुर्वेद कम्पनीको जग्गा हिनामिना प्रकरणमा नेकपा एकीकृत समाजवादीका अध्यक्ष माधव कुमार नेपालसहित ९३ जनाविरुद्ध मुद्दा सुनुवाइका लागि पेसी तोकिएको छ। विशेष अदालतका न्यायाधीश नारायणप्रसाद पौडेल र हेमन्त रावलको इजलासमा सुनुवाइ तोकिएको हो।

अख्तियार दुरुपयोग अनुसन्धान आयोगले जेठ २२ गते यो मुद्दा दायर गरेको थियो। नेपालविरुद्ध अख्तियारले १८ करोड ५८ लाख ५० हजार रुपैयाँ बिगो जरिवाना र सजाय माग गरेको छ। अभियोगअनुसार, तत्कालीन प्रधानमन्त्रीको हैसियतमा उनले सरकारी जग्गा व्यक्तिगत तथा संस्थागत स्वार्थमा हस्तान्तरण गरेको आरोप छ।

नेपाल नेतृत्वको मन्त्रिपरिषद्ले २०६६ फागुन ६ गते पतञ्जलिलाई हदबन्दीभन्दा बढी जग्गा कारोबारको अनुमति दिएको थियो। अख्तियारको दाबीअनुसार, ३१४ रोपनी १५ आना २ पैसा १ दाम जग्गा गैरकानुनी रूपमा बिक्री तथा हिनामिना गरिएको थियो।