काठमाडौं । ९ कात्तिक

चालु आर्थिक वर्ष २०८२/८३ को पहिलो त्रैमास (साउन–असोज)मा नेपालको अन्तर्राष्ट्रिय व्यापार ५ खर्ब ४० अर्ब ८६ करोड रुपैयाँ पुगेको छ। यो अघिल्लो आर्थिक वर्षको तुलनामा २६.०४ प्रतिशतले बढी हो।

भन्सार विभागका अनुसार यस अवधिमा आयात र निर्यात दुवैमा उल्लेख्य वृद्धि भएको छ। असोज मसान्तसम्म देशले ४ खर्ब ६८ अर्ब रुपैयाँ बराबरको वस्तु आयात गरेको छ, जुन अघिल्लो वर्षको तुलनामा १९.७९ प्रतिशत बढी हो। त्यस्तै, निर्यात व्यापार ७२ अर्ब ७८ करोड रुपैयाँ पुगेको छ—गत वर्षको तुलनामा ८९.६४ प्रतिशतले वृद्धि भएको हो।

आयात–निर्यात दुबै बढे पनि निर्यातमा देखिएको उच्च वृद्धि कारण व्यापार घाटाको वृद्धिदर केही घटेको विभागले जनाएको छ। असोजसम्म व्यापार घाटा ३ खर्ब ९५ अर्ब ३० करोड रुपैयाँ बराबर छ, जुन गत वर्षको तुलनामा १२.१८ प्रतिशतले बढी हो।

आयातमा कच्चा सोयाविन तेल, डिजेल, रासायनिक मल, पेट्रोल र खाना पकाउने ग्याँस प्रमुख वस्तु रहेका छन्। निर्यातमा भने सोयाबिन तेल, कार्पेट र सुर्यमूखी तेल अग्रस्थानमा छन्।

नेपालले भारतसँग सबैभन्दा बढी व्यापार गरेको छ—२ खर्ब ५८ अर्ब रुपैयाँको आयात र ५९ अर्ब १२ करोड रुपैयाँको निर्यात। चीनसँग १ खर्ब ४ अर्ब रुपैयाँको वस्तु आयात भएको छ भने निर्यात १८ करोड ६४ लाख रुपैयाँ बराबरको मात्र रहेको छ।

भन्सार विभागका अनुसार निर्यातको हिस्सा ५० प्रतिशतभन्दा बढीले बढेर १३.४६ प्रतिशत पुगेको छ भने आयातको हिस्सा ४.९६ प्रतिशतले घटेर ८६.५४ प्रतिशतमा सीमित भएको छ।

अर्थतज्ज्ञहरूका अनुसार यो चाडबाड सिजनमा उपभोग र बजार क्रियाकलापमा आएको तीव्र वृद्धि नै अन्तर्राष्ट्रिय व्यापार बढ्ने मुख्य कारण बनेको हो।