चितवन, कात्तिक ६ — चितवनमा आइतबार रातिदेखि लगातार भइरहेका सडक दुर्घटनामध्ये यो चौथो मोटरसाइकल दुर्घटना र पाँचौँ मृत्यु भएको जिल्ला प्रहरी कार्यालय चितवनले जनाएको छ।

प्रहरीका अनुसार आज बिहान करिब सवा चार बजे टाँडीबाट भरतपुरतर्फ आउँदै गरेको ग १० प ६१२२ नम्बरको मोटरसाइकल राजमार्गको डिभाइडरमा ठोक्किँदा दुर्घटना भएको हो। दुर्घटनामा मोटरसाइकलका पछाडि बसेका ४४ वर्षीय टंकप्रसाद थापा (घर तनहुँ, देवघाट गाउँपालिका–२; हाल नवलपरासी–बर्दघाट सुस्ता पूर्व, गैँडाकोट–१) को निधन भएको हो।

मोटरसाइकल चालक २६ वर्षीय केशव घर्ती मगर (गैँडाकोट–१) घाइते छन्। उनको भरतपुरस्थित चितवन मेडिकल कलेज शिक्षण अस्पतालमा उपचार भइरहेको जिल्ला प्रहरी कार्यालयका प्रवक्ता डीएसपी रवीन्द्र खनाल ले जानकारी दिए।

गम्भीर घाइते भएका टंकप्रसाद थापाको उपचारका क्रममा सोही अस्पतालमा बिहान पौने पाँच बजे निधन भएको प्रहरीले जनाएको छ।

चितवनमा पछिल्ला चार दिनयता भएका अन्य मोटरसाइकल र स्कुटर दुर्घटनामा चार जनाको मृत्यु भइसकेको छ। आइतबारदेखि अहिलेसम्मका सबै दुर्घटनाहरू राति १० बजेपछि नै भएका छन्।