१२ कात्तिक, काठमाडौं । प्रधानमन्त्री सुशीला कार्कीले बालुवाटारमा जारी जेनजी र राजनीतिक दलहरूसँगको त्रिपक्षीय छलफलमा निरन्तर संवादमा जोड दिन आग्रह गरेकी छिन् ।

प्रधानमन्त्रीको सचिवालयका अनुसार, जेनजी प्रतिनिधिहरूले आफ्नो धारणा प्रस्तुत गरिसकेका छन् भने अहिले सरकार र दलका प्रतिनिधिहरूले विचार राख्ने क्रम जारी छ ।

छलफलको सुरुवातमा प्रधानमन्त्री कार्कीले सबै पक्षलाई खुला मनले विचार आदानप्रदान गर्न आग्रह गर्दै भनिन्, “मुलुक हाम्रो हो, हामीले नै बनाउने हो, हामीले नबनाए कसैले बनाइदिँदैन ।”

उनले थप जोड दिँदै भनिन्, “एकपटकको कुराकानीले हुँदैन, बारम्बार हुनुपर्छ । हामीले सुरुवात गरेका छौं ।”

बालुवाटारमा भइरहेको यो त्रिपक्षीय संवादले आगामी राजनीतिक सहमति र राष्ट्रिय एकतालाई सुदृढ गर्ने अपेक्षा गरिएको छ ।