एसएलआर लुटपाट प्रकरण: राजु परियारमाथि अनुसन्धान गर्न ५ दिनको म्याद थप
काठमाडौं । काठमाडौं जिल्ला अदालतले सुरक्षाकर्मीको हतियार लुटेर प्रदर्शन गर्ने राजु परियारमाथि अनुसन्धान गर्न थप ५ दिनको म्याद दिएको छ ।
२४ भदौको जेनजी आन्दोलनको क्रममा परियाले देशको मुख्य प्रशासनिक निकाय सिंहदरबारको मूल गेट अगाडि सेल्फ लोडिङ राइफल (एसएलआर) कक गर्दै उच्छृंखल गतिविधि प्रदर्शन गरेको प्रहरीको आरोप छ ।
काठमाडौं उपत्यका अपराध अनुसन्धान कार्यालयको ललितपुरस्थित ब्रान्चले उनलाई २८ असोजमा पक्राउ गरेको थियो ।
पक्राउ पर्ने व्यक्ति सम्राट भनेर चिनिने राजु परियार हुन् ।
ललितपुर महानगरपालिका-१३ कुसुन्ती घर भएका ३६ वर्षीय परियारले २४ भदौमा भएको जेनजी आन्दोलनमा राइफल लिँदै उच्छृखंल गतिविधि गरेको भिडिओ, तस्वीर भाइरल बनेको थियो ।
टाउकामा क्याप र मुखमा कालो मास्क लगाएका परियारले माथिको कपडा भने फुकालेका थिए । उनको छातीमा ट्याटु खोपेको पनि भिडिओमा देखिन्थ्यो ।
ट्राउजर र चप्पल लगाएका ती व्यक्ति सिंहदरबार तोडफोड र आगजनीमा अग्रमोर्चामा रहेको आशंका प्रहरीको छ । उनै परियारले सुरक्षाकर्मीको स्वचालित एसएलआर हतियार लुटेर आतंक सिर्जना गरेका थिए ।
राइफल बोकेर पोजिसन लिएको तस्वीर भाइरल भएपछि प्रहरीको केन्द्रीय अनुसन्धान ब्युरो (सीआईबी)ले समेत उनको खोजी सुरु गरेको थियो । घटनाको एक महिनापछि अपराध अनुसन्धान कार्यालयको टोलीले उनलाई ललितपुरको सुनाकोठीबाट पक्राउ गरेको हो ।
प्रहरीका अनुसार परियार यसअघि पनि विभिन्न बैंकिङ कसुर तथा ठगी जस्ता आपराधिक गतिविधमा संलग्न थिए ।
