१२ कात्तिक, काठमाडौं । नुवाकोटको धुनिवेशी नगरपालिका–१ स्थित बञ्चरे कुंडुले ल्यान्डफिल साइटबाट प्रभावित स्थानीयवासीहरू फोहोरमैला व्यवस्थापनको दीर्घकालीन समाधान नहुँदासम्म फोहोर विसर्जन रोकी आन्दोलनमा उत्रिएका छन्।

स्थानीयले बुधबारदेखि शान्तिपूर्ण आन्दोलन सुरु गरेका हुन्। उनीहरूले फोहोर व्यवस्थापनमा स्थायी समाधानको खोजी नगरेको भन्दै फोहोर लैजाने सवारीसाधनहरू फर्काइदिएका छन्।

‘आजदेखि फोहोर बन्द छ। कतिपय गाडीहरू हामीले फिर्ता पठाएका छौँ,’ स्थानीय निराजन सञ्जेलले बताएका छन्। उनका अनुसार फोहोर विसर्जनको दीर्घकालीन योजना र स्थानीय सरोकार समेटिएको ठोस आश्वासन नआएसम्म आन्दोलन जारी रहनेछ।

सञ्जेलले भने, ‘यदि काठमाडौं महानगरपालिका र संघीय सरकारले धुनिवेशी नगरपालिका र ककनी गाउँपालिकालाई छलफलमा नबोलाए भने बिहीबारदेखि आन्दोलनको स्वरूप परिवर्तन हुनेछ।’

उनका अनुसार स्थानीयहरू अहिले शान्तिपूर्ण आन्दोलनमा छन् तर सरकारले बेवास्ता गरे आन्दोलन उग्र हुन सक्ने चेतावनी दिएका छन्।

‘संघीय सरकार र काठमाडौं महानगरले स्थानीयलाई हेपाहा प्रवृत्तिका साथ व्यवहार गरिरहेका छन्,’ सञ्जेलले आरोप लगाए। ‘छलफलका लागि बोलाउनुपर्ने ठाउँमा उल्टो सामान्य कर्मचारीहरूलाई पठाएर हाम्रो माग के हो भनेर सोधिरहेका छन्। यसरी हेपाहा व्यवहार सह्य हुँदैन,’ उनले भने।

स्थानीयहरूले फोहोर व्यवस्थापनको दीर्घकालीन विकल्पमा स्पष्ट योजना ल्याउन र प्रभावित समुदायसँग प्रत्यक्ष छलफल गर्न माग गरेका छन्।