थाई एयर एसियाले आजबाट भैरहवामा आफ्नो उडान पुनः सुरु गरेको छ। गत चैतदेखि रोकिएको यो उडान आइतबार र बुधवार गरी सातामा दुई पटक सञ्चालन हुनेछ।

विमानस्थलका सूचना अधिकारी विनोदसिंह रावतले रातोपाटीलाई जानकारी दिंदै भने, “थाई एयर एसियाको जहाज दिउँसो पौने १ बजे गौतम बुद्ध अन्तर्राष्ट्रिय विमानस्थलमा अवतरण गरेको छ। आजको पहिलो उडानमा १७ जना यात्रु रहेका थिए, जबकि जाँदा १६७ जना यात्रु लिएर जाने तयारी गरिएको छ।”

थाई एयर एसियाले बैंककबाट भैरहवा उडानका लागि गत असारमै अनुमति प्राप्त गरी टिकट बिक्री सुरु गरेको थियो। एयरलाइन्सका अनुसार टिकट बिक्री राम्रो भएको छ र यात्रुहरु नयाँ उडान सञ्चालनको लागि उत्साहित छन्।