बुटवलमा पनि प्रदर्शनको क्रममा आन्दोलनकारी र प्रहरीबीच झडप
स्थानीय प्रशासनले कर्फ्यू आदेश जारी गरे पनि बुटवलमा जेनजी पुस्ताको प्रदर्शन रोकिएको छैन। सोमबार बिहान ९ बजेदेखि सुरू आन्दोलन अहिले पनि जारी छ।
बुटवलका विभिन्न स्थानमा आन्दोलनकारीहरूले प्रदर्शन गरिरहेका छन्।
प्रदर्शनको क्रममा आन्दोलनकारी र प्रहरीका बीचमा झडप भइरहेको छ। प्रदर्शन अराजक बन्दै गएपछि नियन्त्रणका लागि प्रहरीले अश्रुग्यास प्रहार गरेको छ।
जिल्ला प्रहरी कार्यालय रूपन्देहीका प्रमुख प्रहरी उपरीक्षक प्रदीप क्षेत्रीले आन्दोलन नियन्त्रणका लागि अश्रुग्यास प्रहार गर्नुपरेको बताए।
‘अहिले पनि प्रदर्शनकारीहरूको आन्दोलन रोकिएको छैन, प्रशासनले कर्फ्यू आदेश जारी गरेको छ तर, प्रदर्शनकारीहरू सडकमै छन्,’ उनले भने।
कति सेल अश्रुग्यास चल्यो भन्ने यकिन नभएको उनले बताए।
प्रहरी र प्रदर्शनकारीको झडपमा अहिलेसम्म मानवीय क्षति भने नभएको प्रहरीले जनाएको छ।
भैरहवामा बिहान केहीबेर भएको प्रदर्शन दिउँसोदेखि रोकिए पनि बुटवलमा भने दिनभर प्रदर्शन जारी रहेको प्रहरी उपरीक्षक क्षेत्रीले बताए।
यस्तै, आन्दोलनकारीहरूले पूर्वगृहमन्त्री एवं नेपाली कांग्रेसका नेता बालकृष्ण खाँणको घरमा ढुङ्गामुढा गरेका छन्।
तिलोत्तमा नगरपालिका वडा नं. ८ चार नम्बरमा रहेको खाँणको घरमा प्रदर्शनकारीहरूले ढुङ्गामुढा गरेपछि उनीहरूलाई त्यहाँबाट लखेटिएको प्रहरी उपरीक्षक क्षेत्रीले बताए।
प्रदर्शनकारीको ढुङ्गा मुढा गर्दा खाँणको घरको मूल गेटमा क्षति पुगेको छ भने घरका केही सिसाहरू फुटेका छन्।
