काठमाडौँ । जेनजी आन्दोलनका सहिदहरूको स्मृतिमा सुसेला काव्यशालाले शनिबार माइतीघरमा विशेष सांगीतिक कार्यक्रम सम्पन्न गरेको छ।

‘सुसेला काव्यशालाको सातौँ श्रृङ्खला’ अन्तर्गत गरिएको कार्यक्रममा सहिदहरूलाई श्रद्धाञ्जलीस्वरुप चारवटा गीत प्रस्तुत गरियो। ‘सहिदहरूको सम्झना’ (भूपी शेरचन), ‘वी स्याल ओभरकम’ (पिट सिगर), ‘त्यो पुलिस–प्रशासन, त्यो न्यायालय’ (देवव्रत) र ‘त्यो जुत्ता साथीको’ (विनोदविक्रम केसी) गीत गाइएका थिए।

उक्त गीतहरू सुसेला समूहका अञ्जान बाबु, आरती विष्ट, बिराज ढुङ्गाना, श्रवण गौतम, सवीर कार्की, सौरभ ढकाल र अभिषेक शर्माले प्रस्तुत गरेका थिए। सोही क्रममा चित्र र मूर्तिकला पनि प्रस्तुत गरियो ।

गत भदौ २३ र २४ गते जेनजी युवाहरूले भ्रष्टाचारविरुद्ध सञ्चालन गरेको आन्दोलनका क्रममा सरकारी दमनमा परी जेनजी युवाहरूले ज्यान गुमाएका थिए। त्यसपछि भदौ २४ गते भएको विशाल प्रदर्शनले नेपालको राज्यसत्ता नै उल्टिएको थियो।

हालसम्म सो आन्दोलनमा ७३ जनाको ज्यान गएको छ। सहिदहरूको सम्झनामा आयोजित कार्यक्रममा सुसेलाले उनीहरूको सपना छिट्टै पूरा गर्न माग गरेको छ।