गत चैत १५ गते राजावादीहरूको प्रदर्शनका क्रममा कोटेश्वरस्थित जडीबुटी उत्पादन तथा प्रशोधन केन्द्रमा आगजनीमा संलग्नमध्ये चारजनालाई प्रहरीले पक्राउ गरेको छ ।

उपत्यका अपराध अनुसन्धान कार्यालय टेकुका एसपी अंगुर जिसीले खबरहबलाई बताएअनुसार सन्चोसहितका औषधि उत्पादन गर्दै आएको उक्त कम्पनीमा आगो लगाउनेमध्ये अहिलेसम्म चारजना समातिएका हुन् ।

पक्राउ पर्नेमा सिन्धुपाल्चोकको सुनकोशी गाउँपालिका-४ बस्ने दिनेश खड्का छन् । उनलाई प्रहरीले चैत १८ गते काठमाडौंबाटै पक्राउ गरेको हो ।

त्यसैगरी उक्त कम्पनीमा आगो झोस्नेमध्ये अर्का युवक ताप्लेजुङको फुङलिङ नगरपालिका-३ बस्ने सुशील बराल छन् । उनलाई चैत १९ गते समातिएको हो । जडीबुटी कम्पनीमा आगो लगाउने अर्का युवकमा रामेछापको गोकुलगंगा गाउँपालिका-२ निवासी केशव बस्नेत रहेका छन् ।

पछिल्लो पटक आइतबार सिन्धुपाल्चोकको बाह्रबिसेका २७ वर्षीय कुमार तामाङलाई पनि प्रहरीले उक्त उद्योगमा आगो लगाएको अभियोगमा पक्राउ गरेको छ।

तामाङले तीनकुनेबाट अराजक हुँदै अघि बढ्ने क्रममा ट्राफिक लाइट र प्रहरी बस्ने बिट पनि तोडफोड गरेको पाइएको छ। एसपी जिसीका अनुसार तामाङ ट्राफिक लाइट तोड्द लगाएको टीसर्ट लगाएरै घुमिरहेको अवस्थामा पक्राउ परेका हुन् ।