राजावादीको आन्दोलनका क्रममा भएको आगजनी, लुटपाट र तोडफोडमा संलग्नहरू धमाधम पक्राउ पर्न थालेका छन् । 

काठमाडौं प्रहरी परिसरका एसपी एवम् प्रवक्ता अपिलराज बोहराले अहिलेसम्म संलग्न १११ जनालाई पक्राउ गरिएको जानकारी दिए । राजसंस्था पुनर्स्थापनाका लागि गठित संयुक्त जनआन्दोलन समितिको आह्वानमा भएको आन्दोलनका क्रममा शुक्रबार १५ सवारी साधन र १४ ठाउँमा आगजनी तथा १० स्थानमा लुटपाट भएको थियो । 

प्रहरीले लुटपाट, आगजनी र तोडफोडका क्रममा कैद भएका तस्बिर र भिडियोका माध्यमबाट राजावादी पक्राउ गरिरहेको बताइएको छ । प्रहरीले सामाजिक सञ्जालमा आएका सबै फोटो र भिडियो संकलन गर्ने कामलाई तीव्रता दिएको छ । ती फोटो र भिडियोका आधारमा पहिचान भएकामध्ये केही प्रहरी हिरासतमा पुगिसकेका छन् । 

कोटेश्वरको भाटभटेनी लुटपाटमा संलग्नमध्ये केहीलाई पक्राउ गरिएको प्रहरीको भनाइ छ । अन्यलाई फोटो र भिडियो तथा सीसीटीभी फुटेज संकलन गरेर पक्राउ अभियान चलाइएको प्रहरीले जनाएको छ ।

तीनकुने र आसपासका क्षेत्रमा भएको आगजनी, लुटपाट र तोडफोडमा संलग्न सयभन्दा बढी राजावादी प्रहरीको नियन्त्रणमा आइसकेका छन् । प्रहरीले शनिबार ६ जना पक्राउ गरे छ । योसँगै अहिलेसम्म आगजनी, लुटपाट र तोडफोडमा संलग्न १११ जनालाई पक्राउ परिसकेका छन् ।