पोखराको अमरसिंह चोकस्थित पोखरा गेट भत्काइएको छ । पोखरा–मुग्लिन सडक विस्तारका लागि गेट गएराति भत्काइएको हो । लामो समयदेखि गेट नभत्काउन दबाब सिर्जना गरिएको थियो । तर भत्काउनुको विकल्प नभएपछि हटाइएको हो । गेट भत्काएपछि राप्रपा, स्थानीय युवा क्लब र सरोकारवालाहरूले विरोध जनाएका छन् ।

पोखराको ऐतिहासिक सम्पदा विकल्पबिनै भत्काइएको भन्दै उनीहरू आक्रोशित बनेका हुन् । राप्रपा केन्द्रीय सदस्य अरुण गिरी छापामार शैलीमा गेट हटाइएको आरोप लगाउँछन् । ‘छापामार शैलीमा ऐतिहासिक सम्पदा भत्काइएको छ । यसको हामीहरू घोर विरोध गर्छौं, उनले भने ।’ 

पोखरा महानगरपालिकाको आह्वानमा गत साता सर्वपक्षीय बैठक बसेको थियो । बैठकले यसबारेमा ठोस निष्कर्ष निकाल्न सकेको थिएन । राजा वीरेन्द्रको शुभराज्यभिषेकका अवसरमा पृथ्वी राजमार्गअन्तर्गत पोखरामा स्वागतार्थ कलात्मक गेट निर्माण गरिएको थियो ।

गेटको माथिल्लो भागमा बुद्ध र शिवको मूर्तिबिचमा श्रीपेजजडित थियो । पोखरा वडा १० का वडासदस्य पूर्णचन्द्र न्यौपानेले पनि ऐतिहासिक सम्पदा जोगाउनुपर्नेमा विना विकल्प गेट भत्काउनु गलत भएको सुनाउँछन् ।  ‘भत्काउन बाध्यता परे पनि पुरानै शैलीमा पुनर्निर्माणको जिम्मा लिनुपर्छ,’ उनले भने ।

मेयर धनराज आचार्यले गेट उपयुक्त ठाउँमा निर्माण हुने बताए । ‘राजमार्गको काम सकिएपछि उपयुक्त ठाउँमा पोखरा प्रवेशद्वार बनाउँछौँ,’ उनले भने । उनले विकासमा सहयोगको अपिल पनि गरेका छन् । यस सडक खण्डमा ४६ मिटरको सडक बन्ने आयोजनाले जनाएको छ ।