साताको अन्तिम कारोबार दिन अर्थात् बिहीबार नेप्से परिसूचक घटेको छ। नेप्से ७.३३ अंकले घटेर २५८८.६२ विन्दुमा बन्द भएको छ।

यसदिन कारोबार रकम भने अघिल्लो दिनको तुलनामा केही बढेको छ।  गत कारोबार दिन अर्थात् बुधबार ५ अर्ब ८२ करोडको सेयर कारोबार भएकोमा बिहीबार ५ अर्ब ९२ करोडको सेयर कारोबार भएको छ। 

अघिल्लो दिनको तुलनामा कारोबार रकममा १० करोड रूपैयाँ वृद्धि भएको हो। आज २९६ वटा धितोपत्रको १ करोड १७ लाख ३५ हजार ७१५ कित्ता सेयर किनबेच भएको हो।

बिहीबार ८७ कम्पनीको सेयर मूल्य बढेको छ भने १५३ वटाको घटेको छ। यस्तै तीन कम्पनीको मूल्य स्थिर रहेको छ। यसदिन चार कम्पनीको सेयर मूल्य सर्किट लेभलमा बढेको छ। 

बोटलर्स नेपाल (बालाजु), विन नेपाल लघुवित्त र मन्दाकिनी हाइड्रोपावरको मूल्य १० प्रतिशतका दरले बढेको छ भने अपर हेवाखोला हाइड्रोपावरको मूल्य ९.९९ प्रतिशतले बढेको छ।

बिहीबार पोखरा फाइनान्सको मूल्य सबैभन्दा बढी १० प्रतिशतले घटेको छ। उक्त कम्पनीको प्रतिकित्ता मूल्य ४३३ रूपैयाँ कायम भएको छ।

यस्तै जानकी फाइनान्सको मूल्य ९.३९ प्रतिशतले घटेर प्रतिकित्ता मूल्य ५६० रूपैयाँमा झरेको छ। बिहीबार सिन्धु विकास बैंकको सर्वाधिक कारोबार भएको छ।

कम्पनीको प्रतिकित्ता मूल्य एक हजार ४२ रूपैयाँ १० पैसामा २८ करोड ५७ लाख रूपैयाँको सेयर कारोबार भएको छ। यो मूल्य अघिल्लो दिनको तुलनामा ३.९५ प्रतिशत बढेको हो।

सर्वाधिक सेयर खरिद–बिक्री हुने दोस्रो कम्पनीमा एनआरएन इन्फ्रास्टक्चर रहेको छ। उक्त कम्पनीको प्रतिकित्ता एक हजार १७१ रूपैयाँमा २१ करोड १८ लाख रूपैयाँ बराबरको सेयर कारोबार भएको छ। 

आज कारोबारमा आएका १३ वटा समूहगत परिसूचकमध्ये पाँच समूहको परिसूचक बढेको छ भने बाँकी सात समूहको घटेको हो।  यसदिन व्यापार समूहको परिसूचक सर्वाधिक २.०३ प्रतिशतले बढेको छ भने वित्त समूहको परिसूचक सर्वाधिक ५.१९ प्रतिशतले घटेको छ।