सहकारी ठगी प्रकरणमा मुछिएका राष्ट्रिय स्वतन्त्र पार्टीका सभापति रवि लामिछानेको विपक्षमा बहस गरेको भन्दै वरिष्ठ अधिवक्ता दिनेश त्रिपाठीमाथि कुटपिटमा संलग्न एकजनालाई प्रहरीले पक्राउ गरेर म्याद लिएको छ ।

त्रिपाठीमाथि कुटपिट आरोपमा बुधबार नै बबरमहलबाट दोलखा निवासी करिब ४६ वर्षीय ललित केसीलाई प्रहरीले नियन्त्रणमा लिएको हो ।

काठमाडौं प्रहरी परिसरका प्रवक्ता एसपी नवराज अधिकारीले केसीलाई बुधबार नै नियन्त्रणमा लिएर अदालतबाट म्याद थप भइसकेको बताएका छन् ।

कालिमाटीस्थित स्वर्णलक्ष्मी सहकारी संस्थामा भएको एक अर्बभन्दा बढी बचत ठगी प्रकरणमा जाहेरवाला (पीडित)को तर्फबाट बहस गरेर काठमाडौं जिल्ला अदालतबाट बाहिरिने क्रममा त्रिपाठीमाथि एउटा समूहले कुटपिट गरेको थियो ।

काठमाडौं जिल्ला अदालतअगाडि रवि र रास्वाका सयौँ समर्थक जम्मा भएका थिए । रविविरुद्ध बोल्ने र बहस गर्नेलाई रास्वपाका कार्यकर्ताले सामाजिक सञ्जालमासमेत निशाना बनाइरहेका छन् ।

अधिवक्ता त्रिपाठीले आफूलाई तिनै रास्वपाका कार्यकर्ताले कुटेको बताएका छन् । रवि प्रतिवादी रहेको सहकारी ठगी मुद्दामा पीडितको तर्फबाट वकालत गरेकै कारण उनले आफूलाई कुटपिट गरिएको बताएका छन् । कुटपिटमा उत्रिएका केही अराजक व्यक्तिहरूले ‘रवि दाइविरुद्ध मुद्दा लडेर जेल पुर्‍याउने तैँ होइनस्’ भन्दै त्रिपाठीलाई अश्लील गाली गलौज पनि गरेका थिए ।

प्रहरीले केसीमाथि अनुसन्धान भइरहेकाले उनी रास्वपामा संलग्न हो कि होइन भन्ने पुष्टि भइनसकेको जनाएको छ । अनुसन्धान पूरा भएपछि मात्रै केसीबारे भन्न सकिने प्रहरीको भनाइ छ ।

त्रिपाठीमाथि कुटपिट भएपछि नेपाल बार एशोशिएसनसहितका विभिन्न संगठनले कडा विरोध जनाइरहेका छन् । दलहरूले पनि वकालत गर्दैमा अधिवक्तामाथि भएको कुटपिटलाई गम्भीर रुपमा लिएको बताएका छन् ।