बुटवलको सुप्रिम सहकारी ठगी प्रकरणमा पूरक अभियोग लागेका राष्ट्रिय स्वतन्त्र पार्टीका सभापति रवि लामिछानेविरुद्धको मुद्दामा थुनछेक बहस भइरहेको छ । रुपन्देही जिल्ला अदालतका न्यायाधीश प्रह्लाद कुमार योगीको इजलासमा रवि लामिछाने पक्षका कानुन व्यवसायीले बहस गरिरहेका छन् ।

रुपन्देही जिल्ला अदालतका रजिस्ट्रार यज्ञमुर्ति ज्ञवालीका अनुसार रविको पक्षबाट ८ जना कानुन व्यवसायीले बहस गर्न नाम टिपाएकोमा अहिलेसम्म दुई जनाले बहस गरेका छन् ।

प्रतिवादी पक्षको बहस सकिएपछि वादी र प्रतिवादी दुवैतर्फका कानुन व्यवसायीले जवाफी बहस गर्नेछन् ।

इजलासमा शुक्रबार नै जाहेरवालाको तर्फबाट वरिष्ठ अधिवक्ता सुरेन्द्र भण्डारीले बहस   गरेका थिए । उनले बहसमा बचतकर्ताहरूले   दुःख गरेर जम्मा गरेको रकम रवि लगायतका प्रतिवादीले दुरुपयोग गरेको आरोप लगाएका थिए । बचतकर्ताको रकम जसरी भए पनि मिलेर खाने उद्देश्यले प्रतिवादीहरूको भूमिका देखिएको उनको जिकिर थियो ।

बिहीबार ८ जना सरकारी वकिलले बहस गरेका थिए । जाहेरवालाको तर्फबाट वरिष्ठ अधिवक्ता दिनेश त्रिपाठीले पनि बिहीबार नै बहस गरेका थिए ।

गोर्खा मिडिया नेटवर्कमार्फत बुटवलको सुप्रिम सहकारीको बचत हिनामिना सम्बन्धी प्रकरणमा जोडिएका लामिछानेविरुद्ध रुपन्देही जिल्ला अदालतमा सहकारी ठगी र सङ्गठित अपराधको मुद्दा गत आइतबार दर्ता भएको हो । सोही मुद्दाको थुनछेक बहसका लागि लामिछाने बुधबार आफैँ अदालतमा हाजिर भएका थिए ।

बुधबार रविको बयान सकेर बिहीबारदेखि थुनछेक बहस सुरु भएको हो । थुनछेक बहस शुक्रबार साँझसम्म टुङ्गिन्छ या टुङ्गिँदैन भन्ने यकिन छैन ।

सुप्रिम सहकारीको बचत ठगी प्रकरणमा पूर्वगृहमन्त्री समेत रहेका लामिछाने, पूर्वडीआइजी छविलाल जोशी, सहकारीका संरक्षक गितेन्द्रबाबु (जीबी) राईसहितका २२ जनाविरुद्ध सहकारी ठगी र सङ्गठित अपराध कसुरमा गत आइतबार पूरक मुद्दा दर्ता भएको हो ।