नेकपा एमालेको केन्द्रीय सचिवालय बैठकले केन्द्रीय कमिटी बैठकका एजेन्डा तय गर्ने भएको छ । पुस २० र २१ गते बस्ने केन्द्रीय कमिटी बैठकका एजेन्डा सचिवालय बैठकले तय गर्ने एमाले केन्द्रीय कार्यालयका सचिव डा। भीष्म अधिकारीले जानकारी दिए । 

‘सचिवालय बैठक बुधबार ११ बजे पार्टी केन्द्रीय कार्यालय च्यासलमा बस्दैछ । सोही बैठकले केन्द्रीय कमिटी बैठकको मिति घोषणासहित र बैठकका एजेन्डा तय गर्छ’, अधिकारीले भने,‘केन्द्रीय समितिको यो नियमित बैठक बस्न लागेको हो ।’ 

एमालेले पुस २० र २१ गते केन्द्रीय समिति बैठक बोलाउने तयारी गरेपनि बैठक बस्ने मिति औपचारिक रुपमा घोषणा गरिसकेको छैन । 

एमालेको विधानअनुसार केन्द्रीय समिति बैठक प्रत्येक ६ महिनामा बस्नुपर्ने हुन्छ । यसअघि एमाले केन्द्रीय कमिटी बैठक असारमा बसेको थियो । 

केन्द्रीय कमिटी बैठकमा विशेषगरी पार्टीका नियमित कामकारबाही, सङ्गठन निर्माण र सरकार सञ्चालन लगायतका विषयमा छलफल हुनसक्ने नेताहरूले बताएका छन् । सो पार्टीको सङ्गठन विभागले मङ्सिर अन्तिम साता सम्पन्न गरेको राष्ट्रिय कार्यशालाले आगामी माघदेखि चैतसम्म ३ महिने वडा केन्द्रित अभियान सञ्चालन गर्ने निर्णय गरेको थियो । सो निर्णयलाई केन्द्रीय समिति बैठकले कार्यान्वयनका लागि ठोस कार्ययोजना बनाउने नेताहरूको भनाइ छ ।