मोजाम्बिकमा भइरहेको राजनीतिक अशान्तिको फाइदा लिँदै १५ सय कैदीहरू जेलबाट भागेका छन्। त्यहाँ सम्पन्न निर्वाचनको परिणामलाई लिएर झडप भइरहेको समयमा नै सो आक्रमण भएको हो। प्रहरीले दिएको जानकारी अनुसार सुरक्षा गार्डसँगै भएको भिडन्तमा ३३ जना मारिए भने १५ जना घाइते भए।

भागी सकेका १५० जनालाई भने फेरि पक्रिएको छ। गत अक्टोबरमा भएको निर्वाचनको परिणामको विषयमा त्यहाँ कानुनी लडाइँ चलिरहेको थियो। अदालतले सन् १९७५ देखि सत्ता चलाइरहेको फ्रेलिमो पार्टीले नै जित हात पारेको निर्णय भएपछि धेरै अशान्ति भएको हो।

बुधबार राजधानी मापुटोमा सरकार विरोधी प्रदर्शनकर्ता पुगेका थिए। कैदीले आफूलाई त्यहाँबाट बचाउनका लागि सुरक्षाकर्मीसँग झडप गरेका हुन्।

सत्तारुढ दलका डानियल चापोले अक्टोबरमा भएको निर्वाचनमा जित हात पारेको जनाइएको थियो। सोमबार संवैधानिक अदालतले पनि उनैलाई विजयै घोषणा गरेको हो।

अक्टोबरमा भएको निर्वाचनमा चापोले ७१ प्रतिशत तथा उनका मुख्य प्रतिद्वन्द्वी भेनान्सियो मोन्डलाइनले २० प्रतिशत मत पाएका थिए। अहिले संवैधानिक अदालतले गरेको निर्णय अनुसार चापोले ६५ तथा मोन्डलाइनले २४ प्रतिशत मत पाएका हुन्।

सोमबार सोही घोषणापछि भएको हिंसामा कुल २१ जनाको ज्यान गएको त्यहाँको प्रहरीले जनाएका छन्।