अमेरिकाका वर्तमान राष्ट्रपति जो बाइडेनले राष्ट्रपतिमा निर्वाचित भएका डोनाल्ड ट्रम्पलाई हात मिलाएर स्वागत गरेका छन् । दुवैबिच ओभल अफिसमा भेटवार्ता भएको छ ।

खबरका अनुसार जनवरी २० मा ट्रम्पको शपथ ग्रहण अघि, बाइडेन प्रशासनले ट्रम्पलाई सत्ता हस्तान्तरण गर्न आवश्यक वार्ता र औपचारिकताहरू पूरा गरिरहेको छ । यस सन्दर्भमा, बाइडेनले परम्परागत रूपमा ट्रम्पलाई निम्तो दिएका थिए । 

ओभल अफिसको बैठकमा बाइडेनले ट्रम्पलाई हात मिलाएर अभिवादन गरेका थिए । डेमोक्रेटिक प्रशासनबाट रिपब्लिकन क्याम्पमा सत्ता हस्तान्तरणको प्रक्रिया सहज रुपमा सम्पन्न हुने पनि खबरमा भनिएको छ । यस विषयमा औपचारिक सहमति भएको छ । 

ह्वाइट हाउसबाट जारी विज्ञप्ति अनुसार अमेरिकाकी प्रथम महिला जिल बाइडेनले पनि अमेरिकाका नवनिर्वाचित राष्ट्रपति ट्रम्पलाई ह्वाइट हाउसमा स्वागत गरेकी छिन् । 

राष्ट्रपति बाइडेनको साथमा ट्र्रम्पलाई स्वागत गर्न आएकी जिल बाइडेनले ट्रम्पलाई हस्तलिखित बधाई पत्र दिएकी थिइन् । बाइडेनको टोलीले पनि ट्रम्पलाई सत्ता हस्तान्तरण गर्ने प्रक्रिया पूरा गर्न तयार रहेको जनाएको छ ।