काठमाडौं । दोहोरो नागरिकता प्रकरणमा हिरासतमा रहेका कान्तिपुर मिडिया ग्रुपका अध्यक्ष कैलाश सिरोहिया स्वास्थ्यमा समस्या आएपछि शुक्रबार अस्पताल भर्ना भएका छन् । 

उच्च रक्तचाप र मुटुको चालमा समस्या आएपछि अध्यक्ष सिरोहियालाई शुक्रबार साँझ जनकपुरस्थित प्रादेशिक अस्पतालमा भर्ना गरिएको हो । अध्यक्ष सिरोहियालाई लामो समयदेखि नै उच्च रक्तचाप, मुटु र छातिमा समस्या भएको बुझिएको छ ।

दोहोरो नागरिकता प्रकरणमा मंगलबार पक्राउ परेकालाई सिरोहियालाई थप ३ दिनसम्म हिरासतमा राख्न जिल्ला अदालत धनुषाले शुक्रबार अनुमति दिएको हो ।सिरोहियालाई धनुषा जिल्ला अदालतको ५ नम्बर इजलासका न्यायाधीश रोमाकान्त ज्ञवालीको इजलासले शुक्रबारदेखि थप ३ दिनसम्म हिरासतमा राख्न अनुमति दिएको हो ।

धनुषा अदालतको ५ नम्बर इजलासमा पेश गरिएपछि भएको पक्ष विपक्षका वकिलहरूको बहसपछि न्यायाधीश ज्ञवालीले सिरोहियालाई हिरासतमै राखेर अनुसन्धान अघि बढाउन सरकारी वकिल र प्रहरीलाई आदेश दिनुभएको छ ।

सिरोहियालाई अदालतले शुक्रबारसम्म दिएको ३ दिनको म्याद सकिएपछि थप्नका लागि शुक्रबार इजलासमा पेश गरिएको हो । जिल्ला सरकारी वकिल कार्यालय धनुषाका प्रमुख सुदीप दंगालले सिरोहियाको मुदामा अनुसन्धान नसकिएकाले थप ५ दिन म्याद माग्नुभएको थियो । तर अदालतले ३ दिन मात्रै समय दिएको हो ।

अध्यक्ष सिरोहियाको पक्षमा वरिष्ठ अधिवक्ता शम्भु थापासहित वकिलहरूको जम्बो टोलीले बहस गरेको थियो । उनीहरूले फरक नम्बरका २ वटा नागरिकता दिनु राज्यको गल्ती भएको दावीसहित सिरोहियालाई बाहिरै बसेर प्रक्रिया अघि बढाउन दिनुपर्ने बताएका थिए । तर अदालतले उनीहरूको दावी अनुसार आदेश दिएन ।

अध्यक्ष सिरोहियाको पक्षमा थापासँगै मधेश प्रदेशका पूर्वमुख्य न्यायाधिवक्ता दीपेन्द्र झा, वरिष्ठ अधिवक्ताहरू सीताराम भट्टराई, शेरबहादुर केसी, रमन श्रेष्ठ, गोविन्द बन्दी र रमण कर्णसहितले बहस गरेका हुन् ।