एजेन्सी । उत्तरी मेक्सिकोमा बिहीबार चुनावी अभियानका लागि निर्माण गरिएको कार्यक्रमस्थल ९स्टेज० हावाहुरीका कारण भत्किंदा एक बालकसहित ९ जनाको मृत्यु भएको भएको छ । 

नुएभो लियोनका गभर्नर स्यामुएल गार्सियाले सोही दुर्घटनामा परी घाइते भएका मध्ये अहिलेसम्म ९ जनाको मृत्यु भएको र अन्य ५० जनाको घाइतेको उपचार भइरहेको बताएका हुन् । स्थानीय सञ्चार माध्यम र सामाजिक सञ्जालमार्फत सार्वजनिक ‘भिडियो फुटेज’ मा दुर्घटनाको दृश्यलाई देखिन्छ । 

गभर्नर गार्सियाले सामाजिक सञ्जाल एक्समा सान पेड्रो गार्जा गार्सिया सहरमा भएको उक्त घटनालाई एउटा त्रासदीको रूपमा वर्णन गरेका हुन् । पीडितका आफन्तहरूले हावाको तीव्र बेगकाका कारण स्टेज खसेको बताएका छन् । भिडियो सामाग्रीमा सैनिकहरू जमिनमा छरिएका भग्नावशेष र अभियान पोस्टरहरूले भरिएको मैदानमा मेडिकल टोलीहरूले शवहरू भ्यानमा सार्दै गरेको देखिएको थियो ।  

कार्यक्रम सान पेड्रो गार्जा गार्सियाका मेयरका लागि सिटिजन्स मुभमेन्ट उम्मेद्वार लोरेनिया क्यानावतीका लागि चुनावी र्याली र अभियान समापनपछि सम्बोधनका लागि तयार पारिएको थियो । कार्यक्रममा पार्टीका सिनेटर र सांसदहरूका उम्मेदवारहरूले पनि भाग लिएका थिए ।

मेक्सिकोको मौसम विज्ञान शाखाले घटना अघि नै ७० किलोमिटर प्रति घण्टाको हावाले नुएभो लियोन र अन्य उत्तरी राज्यहरूमा सम्भावित आँधीबेहरी आउने चेतावनी दिएको थियो ।