काठमाडौं । उपप्रधान एवं गृहमन्त्री रवि लामिछानेले नेपाली कांग्रेसले डेढ वर्षका लागि गरेको प्रधानमन्त्रीको प्रस्ताव अस्वीकार गरिएकै कारण आफूलाई घेराबन्दी गरेको बताउनुभएको छ ।

आइतबार प्रतिनिधिसभाको बैठकलाई सम्बोधन गर्ने क्रममा उहाँले कांग्रेसको प्रस्ताव नमान्दा यो तहको घेराबन्दी गरिएको गुनासो समेत गर्नुभएको हो ।

उहाँले भन्नुभयो,-'म गृहमन्त्री हुँदा नैतिकताको प्रश्न उठ्छ भने प्रधानमन्त्री हुन चाहीं मिल्ने ? मलाई डेढ वर्ष प्रधानमन्त्रीका लागि गरेको अफर डेट एक्सपायर भयो कि भएन ? कांग्रेस सभापति शेरबहादुर देउवाले घटालथानमा हात राखेर भनुन् ।’

गृहमन्त्री लामिछानेले आफूलाई मध्यराति प्रधानमन्त्रीको अफर गर्नेहरूले त्यसलाई अस्वीकार गर्दा भोलिपल्ट संसद घेर्न थालेको बताउनुभएको छ ।

उहाँले भन्नुभयो,-‘मलाई राति प्रधानमन्त्रीको अफर आयो । मैले अस्वीकार गरे । अनि भोलिपल्ट संसद अवरुद्ध, त्यसपछि छानबिन समिति माग गरियो । यो कुरा हामीलाई सह्य हुने छैन ।’