काठमाडौं । राष्ट्रिय स्वतन्त्र पार्टीका सभापति एवं गृहमन्त्री रवि लामिछानेले सहकारी ठगी जस्तो गम्भीर आरोप लागिसकेपछि आफूले एक पटक संसदबाट जवाफ दिन पाउनुपर्ने अडान दोहोर्याउनुभएको छ ।

सोमबार सिंहदरबारमा प्रधानमन्त्री पुष्पकमल दाहाल र नेकपा एमालेका अध्यक्ष केपी शर्मा ओलीसँगको संवादपछि गृहमन्त्री समेत रहेका लामिछानले अडान नछोड्ने बताउनुभएको हो । उहाँले भन्नुभयो,-‘आरोप लागिसकेपछि एक पटक मैले संसदमा बोल्न पाउनु त पर्‍यो । कांग्रेसले मविरुद्ध प्रमाण छ भनेकाले बोल्न त पाउनुपर्‍यो भनेको हुँ । त्यो प्रमाण बाटोमा या घरमा राखिदिए पनि हुन्छ । तर मैले एक पटक बोल्न पाऊँ भनेर प्रधानमन्त्री दाहालसँग कुरा राखेँ । आफ्ना बारेमा उठेका कुराको बारेमा संसदमा बोल्न पाउनुपर्छ भनेँ । त्यसपछि संसदीय समिति बनाउँदा पनि केही छैन ।’

उहाँले सोमबार दिउँसो कांग्रेस सभापति शेरबहादुर देउवासहित सभामुख देवराज घिमिरेसँगको संवादमा पनि आफूले त्यहीं कुरा राखेको बताउनुभयो । उहाँले भन्नुभयो,-‘एक पटक हातखुट्टा खोलिदिएर कुरा सुन्न त दिनुस् भनेको हुँ । आरोप लगाएको मान्छेलाई बोल्ने मौका त दिनुपर्‍यो नि! फौजदारी आरोप लगाएपछि जवाफ दिन त पाउनुपर्छ । पहिला त मेरो कुरा सुन्नुपर्‍यो। बोल्न दिएपछि छानबिन समिति बनाउँदा हुन्छ । कांग्रेसको माग न्यायसंगत भएन । म माथिका आरोपको बारेमा जवाफ दिएपछि उहाँहरूलाई चित्त नबुझे समिति बनाऊँ ।’

उहाँले दलका नेताहरूसँगको छलफलमा आफ्नो बारेमा उठेका कुरामा जवाफ दिएपछि विकल्पमा जाऊँ भनेको दोहोर्‍याउनुभयो । उहाँले भन्नुभयो,-‘मूल कुरा ममाथि केही महिनादेखि निरन्तर प्रहार भइरहँदा बोल्न पाउनुपर्छ भनेको हुँ । एक पटक कुरा सुन्न सक्ने हिम्मत र धैर्य कांग्रेसमा छैन र ? कांग्रेस जस्तो लोकतान्त्रिक पार्टी विचारलाई निषेध गर्न मिल्छ र ? कांग्रेसले बोल्न नदिएर मेरो मुख टालिदियो, हातखुट्टा बाँधिदियो ।’