टी-२० सिरिजको अन्तिम खेलमा आज नेपालले वेस्ट इन्डिज 'ए' सँग सामना गर्दै
काठमाडौं । टी–२० सिरिजमा एक खेल अगाडि गुमाएको नेपालले वेष्ट इन्डिज ‘ए’ विरुद्ध ५ खेलको शनिबार अन्तिम प्रतिस्पर्धा गर्ने भएको छ ।
५ खेलको सिरिज ४ खेल खेल्दा ३–१ ले गुमाएको नेपालले शनिबार अन्तिम प्रतिस्पर्धा गर्न लागेको हो। सोही खेल शनिबार दिउँसो १ बजे कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने भएको छ । बिहिबार सम्पन्न चौथो खेलमा वेस्ट इन्डिज 'ए' ले नेपाललाई २८ रनले पराजित गर्दै यसअघि नै ५ खेलको सिरिज जितिसकेको हो ।
चौथो खेलमा वेस्ट इन्डिजले दिएको २ सय १० रनको लक्ष्य पछाएको नेपाल २० ओभरमा अल आउट हुँदै १ सय ८१ रनमा समेटिएको थियो। पहिलो खेलमा ४ विकेटको शानदार जित निकालेको नेपाल त्यसपछि लगातार ३ खेलमा पराजित भएको हो। दोस्रो खेलमा १० रनले पराजित भएको नेपाल तेस्रो खेलमा ७६ रनको लज्जास्पद हार खान बाध्य भएको छ ।
५ खेलको सिरिज गुमाए पनि नेपालका कप्तान रोहितकुमार पौडेलको प्रदर्शन भने शानदार रहेको हो । ३ खेल खेलेका उनले एक शतक र २ अर्धशतक बनाएका छन्। पहिलो खेलमा शतक प्रहार गरेका पौडेलले दोस्रो र चौथो खेलमा अर्धशतक बनाएका छन् । पहिलो खेलमा ५४ बलमा १० चौका र ६ छक्का प्रहार गर्दै पौडेलले १ सय १२ रनको कप्तानी पारी खेलेका थिए।
दोस्रो खेलमा नटआउट ४८ बल खेल्दै ६ चौका र २ छक्काको मद्दतमा ७१ रन बनाएका छन्। तेस्रो खेलमा आराम पाएका कप्तान पौडेलले चौथो खेलमा ४७ बलमा ७ चौका र ५ छक्काको मद्दतमा ८२ रन बनाएका हुन् । ३ खेल मात्र खेलेका कप्तान पौडेलले सिरिजकै सर्वाधिक २ सय ६५ रन बनाएका छन्।
सिरिज गुमाइसकेको नेपाल घरेलु मैदानमा शनिबार सान्त्वना जितको लक्ष्यका साथ मैदानमा उत्रिने भएको हो ।