काठमाडौं । सुदूरपश्चिम प्रदेशका मुख्यमन्त्री दीर्घबहादुर सोडारीले शनिबार विश्वासको मत लिनुहुने भएको छ ।

सोही प्रयोजनका लागि प्रदेशसभाको बैठक शनिबार साँझ साढे ५ बजेका लागि बोलाइएको हो । यसअघि शुक्रबारका लागि बोलाइएको बैठक मुख्यमन्त्री सोडारीकै अनुरोधमा शनिबारका लागि सारिएको हो । नेकपा एमालेले विश्वासको मत दिने विषयमा निर्णय नगर्दा मुख्यमन्त्री सोडारीका लागि आह्वान गरिएको शुक्रबारको बैठक स्थगित गरिएको थियो ।

नागरिक उन्मुक्तिपार्टीका संरक्षक रेशम चौधरी पक्षले सोडारीलाई विश्वासको मत नदिन ह्विप जारी गरेको छ । अध्यक्ष रञ्जिता श्रेष्ठ पक्षका २ जना सांसद भने विश्वासको मत दिने तयारीमा रहेका हुन् । उनीहरू दुवै जना प्रदेश सरकारमा सहभागी भएका छन् ।

नेपाली कांग्रेसले भने मुख्यमन्त्री सोडारीले विश्वासको मत लिन खोजे अवरोध सिर्जना गर्ने चेतावनी दिएको हो । असंवैधानिक ढंगले सोडारीलाई मुख्यमन्त्रीमा नियुक्त गरेको भन्दै कांग्रेसले विरोध गर्ने निर्णय गरेको छ । सोडारी यहि वैशाख ६ गते मुख्यमन्त्रीमा नियुक्त हुनुभएको थियो । विश्वासको मत लिन उहाँलाई जेठ ५ गतेसम्मको समय छ ।

५३ सदस्यीय सुदूरपश्चिम प्रदेशसभामा मुख्यमन्त्री सोडारीलाई विश्वासको मतका लागि २७ जना सांसद आवश्यक पर्छ । नेकपा एमाले, नेकपा माओवादी केन्द्र, नेकपा एकीकृत समाजवादी पार्टी, नाउपाको रञ्जिता पक्षका २ जना सांसद र स्वतन्त्र सांसदले विश्वासको मत दिंदा बहुमत पुग्छ ।

प्रदेशसभामा कांग्रेसका १८, माओवादी केन्द्रका सभामुखसहित ११, एमालेका ११, नाउपाका ७, एकीकृत समाजवादीका ४, राप्रपाका एक र एक जना स्वतन्त्र सांसद रहेका छन् ।