९८ प्रतिशत जनसंख्या विद्युतको पहुँचमा, आगामी डेढ वर्षभित्र देशलाई पूर्ण रुपमा विद्युतीकरण घोषणा गर्नेछु: प्रधानमन्त्री दाहाल
काठमाडौं । प्रधानमन्त्री पुष्पकमल दाहालले ९८ प्रतिशत जनसंख्यामा विद्युतको पहुँच पुगेको बताउनुभएको छ ।
काठमाडौंको चन्द्रागिरीमा मस्र्यांदी-काठमाडौं २ सय २० केभी प्रशारण लाइन तथा मातातीर्थ २ सय २० केभी सवस्टेशनको आइतबार उद्घाटन गर्दै उहाँले यस्तो बताउनुभएको हो । प्रधानमन्त्री दाहालले आगामी १ देखि डेढ वर्षभित्र देशलाई पूर्ण रुपमा विद्युतीकरण घोषणा गर्नेगरी सम्पूर्ण तयारी भइरहेको बताउनुभयो । उत्पादित जलविद्युत देशभित्र नै खपत गर्नेगरी विद्युत खपत वृद्धि सम्बन्धी कार्ययोजना मन्त्रीपरिषदबाट पारित गराएर कार्यान्वयनमा ल्याइरहेको उहाँको भनाइ छ ।
प्रधानमन्त्री दाहालले विद्युत खपतको महत्वपूर्ण मानिएको यातायात क्षेत्रमा अहिले विद्युतीय सवारीसाधन प्रयोग देशभर विस्तार भइरहेको र पेट्रोलियम पदार्थको आायतमा पनि गिरावट ल्याएको बताउनुभयो । जलवायु परिवर्तनको नकारात्मक प्रभावका कारण नेपालका सुन्दर हिमालहरु प्रभावित भएको उहाँको तर्क छ । नेपालको जलविद्युत उत्पादनमा पनि जलवायु परिवर्तनको प्रभाव परेको समेत उहाँले बताउनुभयो ।
प्रधानमन्त्री दाहालले प्रशारण लाइन विस्तारमा वन क्षेत्रको प्रयोग, रुख कटान तथा जग्गा अधिग्रहणमा ठूलो समस्या रहेको बताउनुभयो । विकास र पर्यावरणबीच सन्तुलन कायम हुनेगरी योजनाहरु अघि बढाउन आवश्यक रहेको उहाँको भनाइ छ ।
नेपाल सरकार र नेपाल विद्युत प्राधिकरणको संयुक्त लगानी एवं नर्वे सरकार तथा एशियाली विकास बैंकको आर्थिक सहयोगमा मस्र्यांदी-काठमाडौं २ सय २० केभी प्रशारण लाइन तथा मातातीर्थ २ सय २० केभी सवस्टेशन निर्माण गरिएको हो ।
