लुम्बिनीसँग गण्डकी पराजित, समूह विजेता बन्दै एपीएफ सेमिफाइनलमा
केपी ओली कप टी–२० क्रिकेटमा लुम्बिनी प्रदेशले गण्डकी प्ररदेशलाई ५ रनले हराएपछि यो समूहबाट एपीएफ क्लव सेमिफाइनलमा पुगेको छ ।
समुह बीको अन्तिम खेलमा गण्डकी प्रदेश लुम्बिनी प्रदेशसँग ५ रनले पराजित भएको हो । यो समूहका तीन वटै टिमले एक–एक खेल जिते पनि रनरेटमा अघि रहँदै एपीएफ समूह विजेता बनेको हो । लुम्बिनीलाई ८४ रनको फराकिलो अन्तरले हराउने । एपीएफ गण्डकीसँग ४ विकेटले पराजित भएको थियो ।
समूहको अन्तिम खेलमा पोखरा रंगशालामा टस हारेर ब्याटिङको निम्तो पाएको लुम्बिनीले निर्धारित २० ओभरमा ८ विकेट गुमाउँदै १०३ रन बनाएको थियो । लुम्बिनीले दिएको १०४ को लक्ष्य पछ्याएको गण्डकी १८.५ ओभरमा ९८ रन बनाउँदै अलआउट भयो ।
लुम्बिनीका लागि धुव्र सुनार र निर सार्कीले समान २३/२३ रन बनाए । विराट भण्डारी १६ र ओपनर मिर्नाल गुरुङ ११ रनमा आउट भए । अन्य कुनै ब्याटरले दोहोरो अंकमा रन बनाउन सकेनन् ।
गण्डकीका लागि अमृत गुरुङले सर्वाधिक ३ विकेट लिएका थिए । चन्द्र पौडेलले २ तथा कप्तान विपिन खत्री, सुदीप अर्याल र दिनेश बुढामगरले १/१ विकेट लिए ।
लक्ष्य पछ्याउने क्रममा गण्डकीको ब्याटिङ चलेन । गण्डकीका लागि सुदीप अर्यालले सर्वाधिक ३५ रन बनाए । कप्तान विपिन १९ रनमा क्याच आउट भए । दिनेश बुढा मगर १३ र कमल परियारले ११ रन बनाए । लुम्बिनीका लागि मोहम्मद हुसेनले सर्वाधिक ४ विकेट लिए । अजय लुनियाले ३ र रमेश कुर्मीले २ विकेट लिए ।
