बिपी कोइराला स्वास्थ्य विज्ञान प्रतिष्ठान धरानका विभिन्न अतिरिक्त पदमा रहेका ९३ जना चिकित्सक र उच्च पदस्थ  कर्मचारीहरुले उपकुलपति सहितका पदाधिकारीहरुलाई बहिष्कार गर्ने घोषणा गरेका छन्।

चारै जना पदाधिकारीलाई बहिष्कार गर्ने र उनीहरुको मातहतमा रहेर काम नगर्ने भन्दै हस्ताक्षर संकलनमा जुटेका उनीहरुले बिहीबार बिहान सम्ममा ९३ जनाको हस्ताक्षर संकलन गरिसकेका छन्। यो संख्या करिब १ सय ५० हुने हस्ताक्षरकर्ताहरुको भनाइ छ।

‘हामीले नवनियुक्त प्रधानमन्त्री एवम् प्रतिष्ठानका कुलपति शेरबहादुर देउवालाई ४८ घण्टाको अल्टिमेटम दिएका छौं’, बिपीको संयुक्त संघर्ष समितिले भनेको छ, ‘आज साँझसम्मको त्यो समयमा कुनै रेस्पोन्स नभए दैनिक दुई घण्टा ओपिडी बन्द गरिनेछ। र अहिलेका पदाधिकारीलाई शुक्रबारदेखि पूर्ण रुपमा अवज्ञा गरिनेछ।’

उपकुलपतिसहित चारै जना पदाधिकारीको पदमुक्तिको माग गर्दै आन्दोलनमा रहेको संयुक्त संघर्ष समितिको मागमा समर्थन जनाउँदै उनीहरुले उपकुलपति डा ज्ञानेन्द्र गिरीसहितका पदाधिकारी बहिष्कार गर्ने घोषणा गर्दै मातहतमा रहेर काम नगर्ने चेतावनी पनि दिएका हुन्। सबै पदाधिकारी नैतिक रुपमा स्खलित भइसकेको आरोप लगाउँदै उनीहरुले यस्तो चेतावनी दिएका हुन्।