काठमाडौंको शंखरापुरमा होली खेल्ने क्रममा एसिड छ्याप्दा तीन जना बालक घाइते भएका छन्।

आइतबार दिउँसो शंखरापुर नगरपालिका-१ चापाकोटमा होली खेल्ने क्रममा एसिड छ्याप्दा तीन जना घाइते भएको महानगरीय प्रहरी परिसर काठमाडौंका प्रहरी वरिष्ठ उपरीक्षक (एसएसपी) अशोक सिंहले जानकारी दिए।

घाइते हुनेमा ९, ११ र १६  वर्षका बालक छन्। प्रहरीले घटनामा संलग्न भएको आरोपमा दुई जनालाई पक्राउ गरेको छ। पक्राउ पर्नेमा १७ वर्षिय पवन पहाडी र १८ वर्षका आकाश तामाङ छन्।

उनीहरूले होली खेल्ने क्रममा पानी भनेर एसिड फ्याकेका थिए।

घाइते बालकहरूको सुस्मा कोइराला मेमोरियल अस्पतालमा उपचार भइरहेको छ। उनीहरूको हात, अनुहार र कम्मरमा एसिडले लागेको एसएसपी सिंहले बताए।    परिसरले आइतबार होलीमा २५ सय प्रहरी परिचालन गरेको थियो। प्रहरीले दुई सय बढीलाई नियन्त्रणमा लिएको थियो। उनीहरूलाई स्क्रिनिङ गरिरहेको एसएसपी सिंहले जानकारी दिए।