कोभिड–१९ सङ्कट व्यवस्थापन केन्द्र (सीसीएमसी ) ले नेपाल र भारतबीचको यातायात सञ्चालन गर्नका लागि अनुमति दिन मन्त्रिपरिषद्समक्ष सिफारिस गर्ने निर्णय गरेको छ ।

सिंहदबरारमा बिहीबार बसेको सीसीएमसी बैठकले नेपालबाट भारतका बिभिन्न गन्तव्यमा जाने र भारतबाट नेपाल भित्रने सार्वजनिक यातायातका साधनलाई सञ्चालन गर्नका लागि अनुमति दिन सिफारिस गर्ने निर्णय गरेको हो । यसरी नेपााल भित्रने यात्रुहरुले पूर्णरुपमा स्वास्थ्य मापदण्ड प्रयोग गर्नुपर्ने तथा ७२ घण्टा अगाडिको पीसीआर रिपोर्ट नेगेटिभ आएका हुनुपर्ने सचिव खगराज बरालले जानकारी दिनुभयो ।

त्यस्तै बैडकले नेपालतर्फको भन्सार तिरेर निश्चित समयका लागि सञ्चालन हुने भारतीय नम्बर प्लेटका गाडी चलाउन दिने सिफारिस गरिएको सचिव बरालले जानकारी दिनुभयो ।

यातायात व्यवसायीबाट दुईदेशीय यातायात सञ्चालका लागि खुल्ला गर्न अनुरोध आएकाले कोरोना जोखिमलाई मध्यनजर गर्दै आवश्यक निर्णय गरेको बरालले बताउनुभयो ।